«Հանդիպումների ինտենսիվությունը կավելանա, բայց այն արդյունքը, ինչ ակնկալում ենք մենք և իրենք, դժվար թե հասնենք, քանի որ մենք չունենք համագործակցելու կապ, մենք տարբեր պլատֆորմների վրա ենք կանգնած»,-անդրադառնալով Ադրբեջանի ԱԳ նախարար Մամեդյարովի հայտարարությանը, թե նախագահի ընտրություններից հետո ղարաբաղյան բանակցություններն ինտենսիվ են դառնալու, ասաց Արցախի հերոս, գեներալ-մայոր Արկադի Տեր-Թադևոսյանը (Կոմանդոս)՝ հավելելով, որ բանակցությունների արդյունքում շփման գծում կրակոցների ինտենսիվությունը կքչանա։
Արկադի Տեր-Թադևոսյանն անդրադարձավ նաև օրերս ՌԴ Դաշնային ժողովի Դաշնության խորհրդի միջազգային գործերի կոմիտեի պատվիրակության նախագահ Կոնստանտին Կոսաչովի հայտարարությանը, թե ՌԴ-ն ապրիլյան պատերազմից հետո հետևություններ է արել, և Ադրբեջանին զենք չի վաճառի եղած մասշտաբներով։
«Ռուսաստանը չի փոքրացնի Ադրբեջանին զենքի վաճառքի ծավալը։ Գիտենք՝ Ռուսաստանն ինչ վիճակում է, իրեն այդ գումարը պետք է, և նա կարող է այդ ծավալն ավելացնել, նաև Թուրքիային վաճառել»,-հավելեց Արկադի Տեր-Թադևոսյանը:
