«Այսօրվա իրավիճակը ոչ միասնական լինելուց և ժողովրդի անտարբերությունից է գալիս»: Այսօր լրագրողների հետ հանդիպման ընթացքում նման կարծիք հայտնեց նախկին պատգամավոր, ներկայումս ԲՀԿ-ական Զոհրաբ Զոհրաբյանը:
«Պետք է կոնկրետ գործողություններ անել: Հուսահատված ժողովրդին կոչ եմ անում, որ հույսն ու հավատը վերականգնեն: Խնդրում եմ սթափվել և միասնական ուժերով փորձել այս իրավիճակից դուրս գալ»,- ասաց նա:
Զոհրաբյանը անդրադարձավ նաև սեպտեմբերի 3-ի մոսկովյան հայտնի հայտարարությանն ու ասաց. «Ես ինքս կողմ եմ մաքսային միությանը: Պետք է հասկանանք՝ մեզ դա ինչ կտա: Մարդիկ խոսում են՝ բա սահմա՞նը, բայց չեն ասում՝ բա Եվրոպա՞ն: Բայց ո՞ւր են մեր սահմանները Եվրոպայի հետ: 3-5 միլիարդի չափ տարեկան հոսք կարող է լինել դեպի Հայաստանի Հանրապետություն Մաքսային միությանն անդամագրվելու դեպքում: Կա նաև վատ կողմ. մեր օրենքները պետք է համապատասխանեցնենք Մաքսային միությանը»:
«Առաջին լրատվական»-ի հարցին՝ չի՞ անհանգստացնում, արդյոք, թե Հայաստանն ինչ կերպ հայտարարեց այդ որոշման մասին, բանախոսը պատասխանեց. «Իհարկե, կարող է անհանգստություն առաջացնել այն մարդու մեջ, որը չգիտի՝ ինչ օգուտ կբերի Հայաստանին Մաքսային միությունը:
Ես ինքս կողմնակից կլինեի, որ լիներ հանրաքվե, բայց քանի որ հանրաքվե չկա, պետք է սթափ նայել: Մենք մեծ կախվածություն ունենք Ռուսաստանից՝ առաջին հերթին անվտանգության կախվածության խնդիր»:
Այն հարցին, թե կախվածության չափն ավելին է դարձել, ինչո՞ւ է այդպես, բանախոսը պատասխանեց. «Եթե այսօր նայենք, ասում ենք՝ Իրանը մեր եղբայրական պետությունն է, բայց մոռացել ենք, որ հազարամյակներ շարունակ պարսիկները հայերին ավելի մեծ վնաս են պատճառել, քան Թուրքիան: Ես կարող եմ ասել, որ Ռուսաստանից կախվածության քիչ ու շատ լինելու հանգամանքը մենք ինքներս մեր մեջ պետք է փնտրենք»:
Հարցին, թե ինքն իրեն ընդդիմադի՞ր քաղաքական գործիչ համարում է և պահանջո՞ւմ է, արդյոք, գործող նախագահի հրաժարականը, Զոհրաբյանը պատասխանեց. «Ես ինձ երբեք ընդդիմադիր գործիչ չեմ համարել, հիմա էլ չեմ համարում: Հիմա ես ինձ համարում եմ ժողովրդի ծառա: Ես չեմ պահանջում Սերժ Սարգսյանի հրաժարականը, ես կարծում եմ, որ կան բազմաթիվ մարդիկ՝ մինչև նա, որոնք պետք է երկիրն այս վիճակից դուրս բերեին. իշխանության մեջ եղող բազմաթիվ անձինք:
Ես չեմ պաշտպանում որևէ մեկին, ուղղակի եթե Սերժ Սարգսյանը այդքան վատ նախագահ է, այդ դեպքում ինչո՞ւ է 20 տարուց ավել աշխատում այդ իշխանությունների հետ, ինչո՞ւ այն ժամանակ չէին բարձրաձայնում այդ մասին, այն ժամանակ լավն էր, հիմա վա՞տը, այն ժամանակ վատը չէ՞ր:
Երկիրը շատ վատ վիճակում է , բայց արդյոք դրա մեղավորը երկրի նախագա՞հն է միայն. իշխանության 90 տոկոսը մեղավոր է և պատասխանատու, բայց մեղադրել մի մարդու, որը քսան տարի բարձր պաշտոններ է զբաղեցրել և չի մեղադրվել՝ սխալվում եք»:
