Վաղը՝ նոյեմբերի 21-ին, ժամը 19:00-ին ՀՀ Մշակույթի նախարարության և «Օվացիա» պրոդյուսերական կենտրոնի աջակցությամբ «Երազ» բարեգործական հիմնադրամը Գ. Սունդուկյանի անվան ազգային ակադեմիական թատրոնի դահլիճում կազմակերպում է բարեգործական համերգ՝ շաքարային դիաբետով հիվանդ երեխաների համար գլյուկոմետրի թեստ-երիզներ ձեռք բերելու նպատակով:
Համերգի մասնակիցներն են EmpyRay, Jazzel և Imagine Band, The Beautified Project խմբերը:
Հայաստանում շատ լուրջ առողջապահական խնդիր է շաքարային դիաբետը: Համաշխարհային Առողջապահական Կազմակերպության (WHO) տվյալներով տարածաշրջանում շաքարային դիաբետը` որպես մահացության պատճառ ցուցանիշով Հայաստանի Հանրապետությունը առաջինն է, և շաքարային դիաբետի տարածվածությամբ Անդրկովկասում Հայաստանը նույնպես առաջինն է: Դիաբետի Միջազգային Ֆեդերացիայի (IDF) ուսումնասիրության տվյալներով 2030թ.-ին Հայաստանում ամեն 10-րդը հնարավոր է դիաբետիկ լինի:
Ունենք խնդիր, որի դեմ պետք է պայքարել` իրազեկելով հանրությանը, քարոզելով առողջ ապրելակերպ, օգնելով հիվանդներին պայքարել հիվանդության դեմ և վերահսկել հիվանդության ընթացքը նաև տնային պայմաններում, որպեսզի խուսափեն հիվանդության անդառնալի հետևանքներից:
Հայաստանում կա մոտ 450 շաքարային դիաբետով հիվանդ երեխա, սակայն նրանց թիվն օր օրի աճում է: Նրանց մոտ տիպ 1 շաքարային դիաբետն է, երբ օրգանիզմն ընդհանրապես ինսուլին չի արտադրում, և նրանց կյանքն անհնար է առանց ինսուլին ներարկելու: Դիաբետիկ երեխաների համար պարտադիր է նաև տնային պայմաններում արյան մեջ գլյուկոզայի մակարդակի պարբերաբար չափումները գլյուկոմետր կոչվող սարքի միջոցով, ինչն ել ուղղորդում է համապատասխան միջոցառումներ ձեռնարկել հիվանդության անդառնալի բարդությունների դեմ պայքարում:
«Երազ» բարեգործական հիմնադրամը արդեն 3 տարի է պայքարում է խնդրի դեմ. «Մուրացան» հիվանդանոցային համալիրի էնդոկրինոլոգիական կլինիկայում գրանցված շաքարային դիաբետով հիվանդ երեխաներին տրամադրում է գլյուկոմետրեր, ստրիպեր, անհրաժեշտ դեղորայք, վճարում նրանց անհրաժեշտ բուժ. հետազոտությունների համար, կազմակերպում «Դիաբետի դպրոց» ուսուցողական դասընթացներ, կազմակերպում տարբեր միջոցառումներ:
