Լոռու մարզի ընդհանուր իրավասության դատարանում Նարինե Հովակիմյանի նախագահությամբ ավարտվել է Ագնեսա Հաթամյանի գործի դատավարությունը:
Ըստ մեղադրանքի՝ 25-ամյա Ագնեսա Հաթամյանը 2013 թվականի հուլիսի 30-ին Գ. Վարդանյանից կատարել է շորթում:
Հաթամյանին մեղադրանք էր առաջադրվել ՀՀ քրեական օրենսգրքի 182 հոդվածի 1-ին մասով:
Հիշեցնենք, որ այս հանցավոր արարքի կատարումից մեկ ամիս առաջ էր նույն մարզի ընդհանուր իրավասության դատարանը Ագնեսա Հաթամյանի ու ևս երեք հոգու վերաբերյալ քրեական գործի դատավարությունն ավարտել ու դատավճիռ հրապարակել:
Ագնեսան մեղավոր էր ճանաչվել Լոռու մարզի գյուղերից մեկի անչափահաս բնակչուհի՝ 1995 թվականի փետրվարի 10-ին ծնված աղջկան պոռնկությամբ զբաղվելու ոլորտ ներգրավելու համար:
Ըստ արդեն ուժի մեջ մտած դատական ակտի՝ Ագնեսան անչափահաս Ս.-ին 2012 թվականի ապրիլից իր հետ տարել էր շոգեբաղնիքներ, բացատրել, թե ինչպես պիտի իրեն պահի տղամարդկանց հետ:
Անչափահասը շոգեբաղնիքներում սեռական հարաբերություններ էր ունեցել տարբեր տղամարդկանց հետ, յուրաքանչյուրից վերցրել 5-10 հազար դրամ, տաքսու ծառայության համար վճարել 2-ից 4 հազար դրամ:
Ագնեսա Հաթամյանը 2013 թվականի հունիսի 28-ի դատավճռով մեղավոր էր ճանաչվել ՀՀ քրեական օրենսգրքի 166 հոդվածի 1-ին մասով ու դատապարտվել 200 հազար դրամ տուգանքի:
Դատարանը տուգանքի վճարումը տարաժամկետել էր՝ թույլատրելով, որ 10 ամսվա ընթացքում նա ամսական վճարի 20 հազար դրամ տուգանք:
Այդ դատավճիռն ուժի մեջ մտնելու օրն էլ Ագնեսան կատարել էր երկրորդ հանցանքը:
Հոկտեմբերի վերջին նա նոր մեղադրանքով նորից ամբաստանյալի կարգավիճակ էր ստացել՝ մեկ տարվա մեջ հասցնելով երկու տարբեր գործերով կանգնել դատարանի առաջ:
Հաթամյանը 2009 թվականից է բնակվում Վանաձորում: Սկզբում աշխատել է որպես մատուցողուհի, ապա սկսել է մարմնավաճառություն անել Վանաձորի «Մալիբու», «Բելիսիմո», «Կամար», «Լագունա» շոգեբաղնիքներում:
2012 թվականի վերջերին Ագնեսան ծանոթացել է նոր հաճախորդի՝ Գ. Վարդանյանի հետ:
Սկսել են պարբերաբար հանդիպել Վանաձորի տարբեր «հարմար» վայրերում ու սեռական հարաբերություններ են ունեցել:
Վարդանյանը, փաստորեն, վերածվել է մշտական «կլիենտի»: Յուրաքանչյուր հանդիպման համար նա Ագնեսային վճարել է 5 հազար դրամ:
Հերթական անգամ հաճախորդն ու մարմնավաճառուհին հանդիպել են 2013 թվականի հուլիսի 30-ին, ժամը 16-ի սահմաններում Վանաձորի «Կամար» շոգեբաղնիքում: Այնտեղ Վարդանյանը իր «Նոկիա» հեռախոսով տեսանկարահանել է իրենց սեռական հարաբերությունը՝ հետագայում Ագնեսայի հետ դիտելու և հաճույք ստանալու համար: Բայց հաճույքի փոխարեն ուրիշ բան է ստացել…
Աչալուրջ Ագնեսան, նկատելով հաճախորդի արարքը, վերցրել է նրա հեռախոսը, իրենց հարաբերությունների տեսանկարահանումը Վարդանյանի հարազատներին ցուցադրելու, այսինքն, ըստ մեղադրանքի, Վարդանյանին արատավորող ու վարկաբեկող տեղեկությունները հրապարակելու սպառնալիքով վերջինիցս տեղնուտեղը պահանջել է 50 հազար դրամ: Էլ ի՜նչ հինգհազարանոց սեքս:
Վարդանյանը հայտնվել է խնդրողի կարգավիճակում: Նա խնդրել է հարազատներին չցուցադրել «ամոթալի» կադրերը՝ խոստանալով հաջորդ օրը Ագնեսային հանձնել պահանջված գումարը:
Հաջորդ օրվա առավոտյան Վարդանյանը ճշտապահորեն ներկայացել է ժամադրավայր՝ արդեն ոչ թե շոգեբաղնիք, այլ Վանաձորի կայարանամերձ այգի:
Նա Ագնեսային հայտնել է, թե իր մոտ ընդամենը 30 հազար դրամ է, այդքանն է առաջարկել՝ մարմնավաճառուհու լռության դիմաց:
Բայց Ագնեսայի «ախորժակը բացվել էր»:
Նա չի համաձայնել, Վարդանյանին ցույց է տվել նրա մոր բջջային հեռախոսի համարը և սպառնացել է, որ եթե իրեն 70 հազար դրամ չտա, ապա տեսանկարահանումը կհանձնի նրա մորը և կվարկաբեկի սիրասուն զավակին:
Այստեղ արդեն Վարդանյանը հասկացել է, որ Ագնեսայի ձեռքին դառնում է խաղալիք:
Նա օգոստոսի 1-ին ոստիկանությունում հաղորդում է տվել Ագնեսայի կողմից գումար շորթելու մասին:
Քիմիական մշակման ենթարկված թղթադրամներով՝ 70 հազար դրամով Վարդանյանը նույն օրվա երեկոյան գնացել է Ագնեսայի հետ հանդիպման:
Հանդիպել են Վանաձորի Հայքի հրապարակում, մեքենայի մեջ:
Վարդանյանը Ագնեսայի պահանջով նրան է հանձնել մշակված փողը: Ագնեսան չի հասցրել ուրախանալ: Նրան բռնել ու բերման են ենթարկել իրեղեն ապացույց գումարով հանդերձ:
Այս գործը քննվել է արագացված ընթացակարգով: Դատարանն արձանագրել է, որ առկա է հանցագործությունների կատարման ռեցիդիվը:
Միևնույն ժամանակ դատարանը նկատի է առել, որ 2013 թվականի սեպտեմբերի 14-ին Հաթամյանն ամբողջությամբ վճարել է նախորդ դատավճռով սահմանված տուգանքը: Եվ համաներման ակտը նրա նկատմամբ չկիրառելու հիմքեր չկան:
Ագնեսա Հաթամյանը մեղավոր է ճանաչվել շորթման համար՝ ՀՀ քրեական օրենսգրքի 182 հոդվածի 1-ին մասով, և դատապարտվել է 2 տարի ազատազրկման:
Համաներում է կիրառվել, ու Հաթամյանն ազատվել է նշանակված պատժի կրումից:
