Բելգիայում բացվել է կարտոֆիլ-ֆրիի աշխարհում առաջին թանգարանը՝ Frietmuseum-ը: Այն տեղակայված է Բրյուգի ամենահին շենքում՝ 14-րդ դարի գոթական Saaihaile տաճարում: Frietmuseum-ն օգնում է լույս սփռել Բելգիայի ազգային կերակրատեսակներից մեկի պատմության վրա, քանի որ կարտոֆիլի նման տապակման մեթոդն առաջին անգամ կիրառվել է Իսպանական Նիդեռլանդներում (Բելգիա) դեռ 1781-ին:
«Երկար տարիների ընթացքում կարտոֆիլ-ֆրին սիրում են ողջ աշխարհում, և մենք կարող ենք հպարտանալ նրանով, որ այդ ճաշատեսակը ծնունդ է առել Բելգիայում: Հենց այդ պատճառով է մեզ համար կարևոր, որ կարտոֆիլ-ֆրիի առաջին թանգարանը բացվեր հենց Բելգիայում»,- ասել է թանգարանի հիմնադիր Էդդի Վան Բելլը:
Թանգարանի երկու հարկերում բազմաթիվ նմուշներ կան, որոնք նվիրված են ողջ աշխարհում սիրված ուտեստին: Թանգարանում հնարավոր է նաև տեսանյութ դիտել, որի ընթացքում կարտոֆիլը վերածվում է ֆրիի: Թանգարանը հրավիրում է նաև այցելել սեփական սրճարանը, որտեղ հնարավոր է ճաշակել համեղ բելգիական կարտոֆիլ-ֆրին:
