Հայաստանի և Ադրբեջանի նախագահներն իրենք պետք է վճռորոշ քայլեր ձեռնարկեն Լեռնային Ղարաբաղի հակամարտության կարգավորման ուղիները որոնելու համար: Ինչպես հաղորդում է contact.az-ը, նման հայտարարությամբ հանդես է եկել Ադրբեջանում ԱՄՆ դեսպան Ռիչարդ Մորնինգսթարը:
Մորնինգսթարի խոսքերով՝ մարդիկ հարցնում են, թե ինչու ԱՄՆ-ը չի լուծում Լեռնային Ղարաբաղի խնդիրը: Նա նշել է, որ եթե դա հեշտ լիներ, ապա վաղուց լուծած կլիներ: Դիվանագետը հիշեցրել է, որ դեռևս 1990-ական թթ. վերջին այդ ժամանակ ԱՄՆ պետքարտուղար Մադլեն Օլբրայթի նախաձեռնությամբ Հայաստանի նախագահ Ռոբերտ Քոչարյանը և Ադրբեջանի նախագահ Իլհամ Ալիևը բանակցություններ են վարել: Այդ ժամանակ ակնկալվում էր, որ խնդիրը կլուծվի, սակայն նման բան տեղի չունեցավ:
«ԱՄՆ-ը ցանկանում է խնդրի լուծում, սակայն դա չի արվում կախարդական փայտիկի շարժումով: Իհարկե, մեծ տերությունները ևս ունեն իրենց շահերը, սակայն եթե Հայաստանի և Ադրբեջանի նախագահները վճռորոշ քայլեր ձեռնարկեն, ապա մեծ տերություններն իրենց շահերը կհամապատասխանեցնեն այդ որոշման հետ: Եթե երկու երկրների նախագահները որոշման գան, ապա Մինսկի խումբը և ԱՄՆ-ը կօգնեն նրանց»,- ասել է դեսպանը:
Մորնինգսթարը հույս է հայտնել, որ մոտակա ժամանակներս կհաջողվի անցկացնել Հայաստանի և Ադրբեջանի նախագահների հանդիպում, և նրանք վճռական միջոցներ կձեռնարկեն հակամարտությունը կարգավորելու համար:
