ՀՀ ԱԺ արտաքին հարաբերությունների և ԱԺ եվրոպական ինտեգրման հարցերի մշտական հանձնաժողովները քիչ առաջ սկսեցին «Հայաստանի և ԵՄ-ի միջև վիզաների տրամադրումը դյուրացնելու մասին» համաձայնագրի և «Եվրոպական համայնքների և դրանց անդամ պետությունների՝ մի կողմից, և մյուս կողմից՝ ՀՀ-ի միջև Գործընկերության և համագործակցության համաձայնագրի՝ ԵՄ ծրագրերին ՀՀ մասնակցության ընդհանուր սկզբունքների վերաբերյալ ԵՄ-ի և ՀՀ-ի միջև շրջանակային համաձայնագրի մասին» արձանագրության ներազդեցությունը «ՀՀ-ԵՄ հարաբերությունների զարգացման համատեքստում» թեմայով խորհրդարանական լսումներ:
Բացման խոսքով հանդես եկան ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանն ու ՀՀ ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը, ովքեր նշեցին, որ համաձայնագրերը բազում հարցեր են առաջացնում հանրության մոտ, որոնք պետք է իրենց պատասխանը ստանան նման լսումների միջոցով:
Նախատեսվում էր ՀՀ արտաքին գործերի փոխնախարար Զոհրաբ Մնացականյանի ելույթը, ով, ինչպես տեղեկացրեց Արտակ Զաքարյանը, աշխատանքային այցով գտնվում է Բրյուսելում: Նրա փոխարեն համաձայնագրերի շուրջ խոսեց ԱԳՆ ներկայացուցիչ Արմեն Գիլոյանը:
Վերջինիս համոզմամբ՝ այդ համաձայնագրերի հիմնական շահառուները պետք է լինեն հայաստանցիները: Իսկ համաձայնագրի ուղղությամբ աշխատանքները, նրա խոսքով, հնարավոր դարձավ ՀՀ-ԵՄ կամքի դրսևորման շնորհիվ, և դրանք փոխկապակցված են, և նախընտրելի է, որ համաձայնագրերն ուժի մեջ մտնեն զուգահեռաբար: Նրա պարզաբանմամբ՝ համաձայնագրում դրույթները վերաբերում են ՀՀ քաղաքացիներին, նաև՝ մասնագետներին: Նա մանրամասն ներկայացրեց, թե հանրության որ շերտերը կարող են օգտվել համաձայնագրի տրամադրած առավելություններից:
Իր հերթին ՀՀ ԱԺ արտաքին հարաբերությունների մշտական հանձնաժողովի փոխնախագահ Ալեքսանդր Արզումանյանն ասաց, թե շատերը կարծում էին, որ այս համաձայնագրերը կլինեն առաջին քայլը, որից հետո Վիլնյուսում կստորագրվի ԱՀ/ԽՀԱԱԳ: Նրա խոսքով՝ սա մի գործընթաց էր, որը լի է վայրիվերումներով, բայց վերջին մեկ տարվա բանակցությունների արդյունքում Հայաստանը կարողացավ ակտիվորեն ի մի բերել բոլոր խրթին հարցերը՝ ստանալով մի հրաշալի փաստաթուղթ:
«Հիմա ՀՀ իշխանությունները ծանր իրավիճակում են, մի կողմից՝ չբարձրաձայնելով, որ կան ճնշումներ, այնուամենայնիվ՝ մենք հիմա պետք է փորձենք ի մի բերել մի շարք այլ հարցեր: Վերջին գործընթացները համարում եմ արգելակում, բայց չեմ գտնում, որ ճանապարհը փակ է: Այս պայմանագրերը կարևորում եմ: Շփումները հնարավորություն կտան ձերբազատվել կարծրատիպերից, թերի ընկալումնրից Եվրոպայի մասին և հակառակը՝ իրենց կողմից ՀՀ-ի մասին: Կարծրատիպերը կարելի է ջարդել փոխադարձ այցելություններով»,- ասաց Ալ. Արզումանյանը:
Լուսանկարը՝ Photolure-ի
