Թեև պարբերաբար խոսվում է ՀԷՑ-ի արդիականացման, իրականացվող ներդրումների մասին, սակայն քաղաքացիները շարունակում են դժգոհ մնալ հոսանքի պարբերական անջատումներից, տատանումներից, որոնք երբեմն օրվա մեջ մի քանի անգամ են լինում, հաջորդում են իրար, որի պատճառով քաղաքացիների էլեկտրատեխնիկան շատ դեպքերում շարքից դուրս է գալիս։
Այս խնդիրն արդեն տարիներ շարունակ է առկա է և ոչ մի կերպ լուծում չի ստանում։ Վիճակն այնքան սրվեց, որ սպառողների իրավունքների պաշտպանությամբ զբաղվող ՀԿ-ները հասան նրան, որ ՀԷՑ-ում դիմումի հստակ ձև մշակվեց, որը լրացնելով՝ քաղաքացին նշում է, թե անջատումների պատճառով ինքը ինչ վնաս է կրել, և փոխհատուցում է պահանջում։ Համարժեք փոխհատուցում, սակայն, ոչ բոլոր դեպքերում է տրամադրվում քաղաքացիներին։ Եթե խոսքը գումարային փոխհատուցումների մասին է, ապա այդ պրոցեսը ամիսներ է տևում, քաղաքացին կանգնում է ապացուցման խնդրի առաջ, որպեսզի հիմնավորի, որ իր տեխնիկան վնասվել է հենց հոսանքի անջատման, տատանումների պատճառով։ Իսկ եթե քաղաքացին գումարային պահանջ չի դնում, ապա ՀԷՑ-ը գրեթե առանց խոչընդոտի իրեն պատկանող սերվիս-կենտրոնում վերանորոգում է վնասված տեխնիկան։
«Ի դեպ, հենց մեր հորդորով հնարավոր եղավ հասնել նրան, որ սպառողները կարողանան ՀԷՑ-ին պահանջ ներկայացնել, որ իրենց տատանումների պատճառով է վնասվել տեխնիկան։ Իրենք դիմումի ձև մշակեցին, և սպառողը, խնդրի դեպքում, գնում է, դիմումը լրացնում է, և ընթացք են տալիս խնդրին»,- «Առաջին լրատվական»-ի հետ զրույցում ասաց Չիլինգարյանը։
Վերջինիս խոսքով, սակայն, խնդիրը մեծամասամբ նաև սպառողների մեջ է։ Երբ հոսանքի տատանումներ են լինում, և դա մեկ կամ երկու շենքում չի լինում, այլ տարածքը շատ ավելի մեծ է լինում և տասնյակ շենքեր է ներառում, այդ տարածքից 1-2 բողոք է լինում։ «Եթե բոլորը բողոքեն, ՀԷՑ-ը առանց խնդրի կընդունի, որ դա իր մեղքով է եղել։ Մանավանդ, որ այդ տատանումները իրենց մոտ ֆիքսվում են։ Բայց եղել է դեպք, որ ընդամենը մի մարդ է բողոքել, և ՀԷՑ-ը չի բավարարել այդ բողոքը՝ այն պատճառաբանությամբ, որ իրենց մոտ տատանում չի եղել, եթե լիներ, մյուս բնակիչներն էլ կտուժեին»,- նշեց Չիլինգարյանը։
Մեր զրուցակցի խոսքով՝ քաղաքացին խնդրի առաջ է կանգնում նաև այն ժամանակ, երբ պետք է ապացուցի, որ տեխնիկան վնասվել է հենց ՀԷՑ-ի պատճառով, քանի որ հնարավոր է՝ այդ շենքում մեկը եռակցման ինչ-որ աշխատանք տանի, ու տատանումը պայմանավորված լինի դրանով, ՀԷՑ-ի մեղքը չլինի։ «Խնդիրները սրանք են։ Բայց դրանցից բացի՝ այլ խնդիրներ կան։ Օրինակ՝ երբ ամռանը փչացել է սառնարանը հոսանքի տատանման պատճառով, ու մինչև ՀԷՑ-ը իր սերվիս-կենտրոնում վերանորոգում է այդ սառնարանը՝ 2-3 շաբաթ է տևում, ու քաղաքացին դրա պատճառով այլ խնդիրների առաջ է կանգնում, մթերքն է փչանում։ Պարզապես Հայաստանում սպառողը այդքան հետևողական չի լինում, նման պահանջներ չի դնում, դրա համար էլ այս վիճակն է»,- եզրափակեց Կարեն Չիլինգարյանը։
