«Ինձ համար անհասկանալի է եղել այս որոշումը: Վրաստանը Հայաստանի համար թերևս կարևոր երկրների շարքում է, եթե չասենք՝ ամենակարևորը, ըստ էության մեր դարպասն աշխարհի հետ: Եվ այս իմաստով ես միշտ կարծել եմ՝ Վրաստանում պրոֆեսիոնալ դիվանագետ ունենալը օրախնդիր է»,-անդրադառնալով Վրաստանում օրերս դեսպան նշանակված Ռուբեն Սադոյանին՝ ասաց Վրաստանի «Ալիք մեդիա» հայալեզու հարթակի գլխավոր խմբագիր Արսեն Խառատյանը:
Ռուբեն Սադոյանը ֆինանսիստ-տնտեսագետ է, չունի դիվանագիտական աշխատանքի փորձ: Այս հանգամանքը, ըստ Արսեն Խառատյանի, ենթադրում է, որ բիզնես տարածքի մասին է խոսքը լինելու: «Գաղտնիք չէ, որ Վրաստանում 12000 հազար ՀՀ քաղաքացու անունով բիզնես կա գրանցված, և ոչ ոք դա կասկածի տակ չի առնում: Այս մարդը հարկային վարչարարության տարածքից է գալիս, նրա քաղաքական հայացքների, պատկերացումների մասին տեղեկատվություն չունենք, որովհետև գոնե մեկ անգամ ելույթ ունենալիս չենք տեսել»,- ասաց Արսեն Խառատյանը:
Արսեն Խառատյանն անդրադարձել է նաև Բաքու-Թբիլիսի-Կարս երկաթգծի գործարկմանը, թե որքանով է Վրաստանի տնտեսության համար ձեռնտու դրա շահագործումը: Վրաց փորձագետները նշում են, որ սա ավելի շատ քաղաքական նշանակություն ունի և ոչ տնտեսական: Արսեն Խառատյանի խոսքով՝ երկաթգծի գործարկման քաղաքական նշանակության մասին խոսվել է և խոսվում է թե՛ փորձագետների, թե՛ պաշտոնյաների կողմից. «Դրա քաղաքական լինելու իրողությունը կասկածի տակ չի առնվում: Այլ խնդիր է, թե սա ինչ գին է ունենալու, և Վրաստանի պարագայում որքանով է դա ձեռնտու լինելու»:
Ամբողջությամբ՝ տեսանյութում:
