ԵՄ-ն պատրաստում է աշխարհի թեժ կետերից փախստականների հոսքի կարգավորման պլան: Իտալիայի ափերի մոտ հոկտեմբերի 3-ին տեղի ունեցած ողբերգությանն ի պատասխան, որտեղ նավի խորտակման հետևանքով ավելի քան 350 մարդ զոհվեց, Բրյուսելը խոստացել է փախստականների աջակցության համար 30 մլն եվրո հատկացնել, Հռոմը՝ ևս 190 մլն եվրո: Սակայն ԵՄ-ում խոստովանում են՝ սուբսիդիաները չեն կարող փոխհատուցել օրենսդրական խնդիրները. Եվրոպայում փախստականների հարցով միասնական քաղաքականություն չկա:
Օրերս ողբերգության վայր են այցելել Եվրահանձնաժողովի ղեկավար Ժոզե Մանուել Բարոզուն և Իտալիայի վարչապետ Էնրիկո Լետան: Բարոզուն հայտարարել էր, որ մարտահրավերները, որոնց բախվում են Լամպեդուզան և Իտալիան, Եվրոպայի մարտահրավերներն են: Նա նշել է, որ նման բան Եվրոպայում չպետք է կրկնվի: Լամպեդուզայի բնակիչները Եվրահանձնաժողովի ղեկավարին և իտալացի վարչապետին ուղեկցել են սուլոցներով:
Նույն օրը հայտնի դարձավ, որ Բրյուսելը պատրաստ է 30 մլն եվրո տրամադրել Իտալիայի փախստականների համար ենթակառուցվածքների կառուցմանը:
Լամպեդուզայի մոտ զոհվածները հետմահու Իտալիայի քաղաքացիություն կստանան և պատվով կհուղարկավորվեն՝ փոխանցում է Kommersant-ը:
Գործողությունների իր պլանն է ԵՄ-ին առաջարկել Ֆրանսիայի նախագահ Ֆրանսուա Օլանդը: Նա կոչ է արել կենտրոնանալ երեք ուղղությունների վրա՝ պրոֆիլատիկ աշխատանքը տարածաշրջաններում, սահմանային վերահսկողության ուժեղացումը և հարաբերությունների ակտիվացումը կոնկրետ երկրների հետ, որոնք դիվանագիտական և այցագրային պարզեցումների դիմաց կվերահսկեն էմիգրացիան և տարանցումները: ԵՄ երկրների ներքին գործերի նախարարների հանդիպմանը որոշվել էր ստեղծել միգրացիոն քաղաքականության օպերատիվ արձագանքման խումբ, իսկ Եվրախորհրդարանը կոչ էր արել մարդասիրական խնդիրներին նվիրված միջազգային համաժողով անցկացնել:
Իտալական ԶԼՄ-ների տվյալներով՝ վերջին 4 տարիներին Լամպեդուզայի ափերի մոտ զոհվել է ավելի քան 800 մարդ:
Շարունակում է գործել 2002 թվականին Բեռլուսկոնիի կառավարության ընդունած օրենքը, որը Լամպեդուզա հասած էմիգրանտներին սպառնում է 5000 եվրո տուգանքով կամ 1.5 տարվա ազատազրկմամբ՝ սահմանն ապօրինի հատելու համար:
