Հայաստանի հանրապետական կուսակցությունը չի պատրաստվում ԱԺ Էթիկայի հանձնաժողով դիմել «Ժառանգություն» խմբակցության պատգամավոր Զարուհի Փոստանջյանի՝ ԵԽԽՎ-ում դրսևորած վարքագծի հարցով:
«Առաջին լրատվական»-ի հետ զրույցում ԱԺ փոխխոսնակ, ՀՀԿ անդամ Հերմինե Նաղդալյանը չցանկացավ մեկնաբանել Էթիկայի հանձնաժողով դիմելու անհրաժեշտության հարցը: «Ես ընդհանրապես մամուլում իմ կարծիքն այդ հարցի մասին հայտնել եմ և ասել եմ, որ չարժե ընդհանրապես այդ հարցը քննել կամ դրա մասին խոսել»,- ասաց նա:
ԱԺ ՀՀԿ խմբակցության ղեկավար Գալուստ Սահակյանը նշեց, որ նման մտադրություն չունեն և դրա անհրաժեշտությունը չեն տեսնում: «Իհարկե, չենք դիմելու: Առանց Էթիկայի հանձնաժողովի էլ էթիկան պարզ է, էլ ինչու ենք դիմում: Երբ ասում եք՝ պատվիրակության կազմից հանել-հեռացնել, դա այդպես չէ. մենք ունենք վեց խմբակցություններ, այդ պատվիրակության կազմում հինգ խմբակցություններ են, այսինքն՝ փոքր խմբակցությունում պիտի ռոտացիա արվի, ՕԵԿ-ն, օրինակ, հիմա անդամ չունի, դրա համար տարին մեկ անգամ ռոտացիա պիտի արվի»,- ասաց Սահակյանը:
ՀՀԿ խմբակցության ղեկավարի խոսքերով՝ ԵԽԽՎ պատվիրակության կազմում սովորաբար ոչ թե պարտադիր է բոլոր խմբակցությունների ներկայությունը, այլ խնդիր է դրված, որ և ընդդիմությունը ներառված լինի պատվիրակության մեջ, և իշխանական կուսակցությունները: Այսօր, Սահակյանի խոսքերով, պատվիրակության մեջ ութ անձ են՝ փոխարինողների հետ միասին. երեքը ներկայացնում են իշխող ուժը, մյուս հինգն ընդդիմությունից են, մինչդեռ սովորաբար այլ երկրներում հակառակն է լինում:
«Սովորաբար առավել շատ ընդգրկված է լինում քաղաքական մեծամասնությունը և նաև ընդգրկված է լինում ընդդիմությունը, բայց պարտդիր չէ, որ բոլոր ընդդիմադիրները ներկայացված լինեն, միայն երկու կամ երեք հոգի»,- ասաց նա:
Ի դեպ, նշենք, որ մամուլում նախօրեին լուրեր էին շրջանառվում, որ ԵԽԽՎ հայաստանյան պատվիրակությունում Զարուհի Փոստանջյանին փոխարինելու է ՕԵԿ-ական պատգամավոր Մհեր Շահգելդյանը:
