Երևանի ավագանու ԲՀԿ-ական անդամ Սամվել Շառոյանի գործը գտնվում է Շենգավիթ վարչական շրջանի ընդհանուր իրավասության դատարանում, սակայն ապացույցների ոչ բավարար լինելու պատճառով նիստը հետաձգվել է մինչև նոյեմբերի 10-ը. «Դատը հետաձգել են, իմ ներկայացրած փաստաթղթերը դատարանը համարեց սակավ: Մնացած տեղեկանքներն էլ քաղաքապետարանից, արխիվներից պետք է գտնեմ, տանեմ-ներկայացնեմ»:
Գևորգ Թումասյանը պնդում է, որ նախկինում Ներքին Չարբախի լիազոր ներկայացուցիչ Սամվել Շառոյանը 2005 թվականին իր մորից 6000 դոլար գումար է վերցրել ու մինչ օրս վերադարձրել է միայն 440 դոլարը:
Ըստ նրա` դատարանի վճռից հետո գումարված բանկային տոկոսներով Շառոյանն այժմ արդեն պարտք է մոտ 8-9 հազար դոլար:
Թումասյանն ասում է, որ 2005 թ. փորձել են գնել իր թռչնանոցը` հետագայում այն տուն դարձնելու նպատակով: «Տարիներ շարունակ գումար էինք հավաքում, Սամվել Շառոյանն էլ մորս առաջարկել էր գնել թռչնանոցը՝ փոքրիկ հողակտորով: Սակայն այն կադաստրային գրանցում չուներ, պայմանավորվել են իրար հետ, պարտավորագիր են ստորագրել, իսկ 2 ամիս անց Շառոյանն ասաց, թե չի ստացվում, չի կարողացել դասավորել փաստաթղթերը, բայց գումարն էլ ծախսել է, և մայրս պետք է համբերի, որ գումարը հավաքի, հետո տա, և այդպես էլ չի վերադարձրել»:
Երբ դատարանը վճռել է, որ ավագանու ԲՀԿ-ական անդամը պետք է վերադարձնի գումարը, նա իր տունն ու ունեցվածքը մի քանի օրում նվիրել է այլ անձի` փաստացի դառնալով ունեզուրկ և անօթևան:
Հիմա այդ թռչնանոցի վրա կալանք է դրված, և Գևորգ Թումասյանը դատարանից պահանջում է, որպեսզի այն ճանաչեն Շառոյանի սեփականությունը և բռնագանձեն. թռչնանոցը կադաստրային գրացնում չունի և իրենը չի համարվում: Ի դեպ, Սամվել Շառոյանը դատական նիստերին չի ներկայացել, նրա փոխարեն եկել է փաստաբանը:
«Իսկ ընդհանրապես, իր մեղքն ընդունել-չընդունելը շատ քիչ է»,- ասաց Գ. Թումասյանը:
