«Ես հանրապետության նախագահին երկու շաբաթ առաջ խնդրել եմ, որ ինձ ազատի աշխատանքից»,- «Առաջին լրատվական»-ի հետ զրույցում իր հրաժարականն այսպես մեկնաբանեց Արարատի մարզպետ Էդիկ Բարսեղյանը` հավելելով. «Ես բավական երկար տարիներ՝ 1970 թվականից, պետական համակարգում եմ աշխատել: Անգործ որևէ շաբաթ չեմ եղել, և ժամանակ է եկել, որ ուզում եմ մի երկու տարի էլ ակտիվ հանգիստ անցկացնել իմ համար»:
Մեր հարցին՝ ինչպե՞ս է պատասխանել Սերժ Սարգսյանն իր առաջարկին և նրա կողմից որևէ առաջարկ չի՞ եղել, մարզպետը պատասխանեց. «Ոչ, իմ առաջարկն ընդունել է նորմալ, և ես շնորհակալություն եմ ասել իմ առաջարկն ընդունելու համար: Ջերմուկ քաղաքում մարզպետների հետ հանդիպմանը ևս մի անգամ խնդրել եմ, և նախագահը չի մերժել իմ խնդրանքը, և ես դիմում եմ ներկայացրել կառավարություն` աշխատանքից ազատվելու համար, որ իմ տեղը զիջեմ ավելի երիտասարդ կադրերի»:
Որոշ տեղեկություններով` առաջիկայում Արարատի մարզպետ է նշանակվելու պատգամավոր Արայիկ Գրիգորյանի եղբայրը, դաշնակցական Արամայիս Գրիգորյանը, ով կոալիցիոն կառավարությունում գյուղատնտեսության նախարար էր:
Էդիկ Բարսեղյանի հետ «Առաջին լրատվական»-ի ամբողջական հարցազրույցը կարդացեք առաջիկայում:
