Երևանում այսօր ՌԴ առևտրի և արդյունաբերության նախարարի տեղակալ Գեորգի Կալամանովի նախագահությամբ մեկնարկեց Հավաքական անվտանգության պայմանագրի կազմակերպության (ՀԱՊԿ) ռազմատնտեսական համագործակցության միջպետական հանձնաժողովի 11-րդ նիստը:
Հայաստանի Հանրապետության Ազգային անվտանգության խորհրդի քարտուղար Արթուր Բաղդասարյանը, ողջունելով հյուրերին, նշեց, որ ՀԱՊԿ-ի հետ համագործակցությունը լավ կազմակերպչական հիմք է դրել՝ լուծելու իրենց առջև ծառացած խնդիրները և իրականացնելու նպատակները: «Մեր ուժերի միավորումը հասել է շոշափելի արդյունքների: Սա սերտ և փոխադարձ շահավետ համագործակցություն է: Հուսամ՝ նույն կերպ կշարժվենք առաջ»,- ասաց նա:
Բաղդասարյանի խոսքով՝ հանձնաժողովի նիստերից յուրաքանչյուր հաջորդը դառնում է նախորդի շարունակությունը, նպաստում համագործակցության որակական աճին: Նա կարևորեց նաև Գործարար խորհրդի դերը: Առաջիկայում կստեղծվի մի քանի համատեղ կազմակերպություն, որի շուրջ բավական մեծ հետաքրքրվածություն կա:
ՀԱՊԿ գլխավոր քարտուղար Նիկոլայ Բորդյուժան ելույթից առաջ շնորհավորեց Հավաքական անվտանգության պայմանագրի կազմակերպության (ՀԱՊԿ) ռազմատնտեսական համագործակցության միջպետական հանձնաժողովի նոր նախագահին՝ Կալամանով Գեորգի Վասիլևիչին, ինչպես նաև շնորհակալություն հայտնեց նախորդին՝ իր գործունեության համար:
Նրա խոսքով՝ ռազմատնտեսական համագործակցությունը բարձրացնում է իր դերը՝ որպես անվտանգության ոլորտում համագործակցության կարևորագույն բաղադրիչ: Բորդյուժան, նշելով ՀԱՊԿ շրջանակներում գրանցված նախկին հաջողությունները, միաժամանակ նշեց, որ առաջիկայում համագործակցության հիմնական ուղղություններից մեկը լինելու է ռազմական տեխնիկայի վերանորոգման սերվիս-կենտրոնների ստեղծումը: Հատուկ ուշադրություն է դարձվում ՀԱՊԿ անդամ-երկրների ռազմական արդյունաբերության մրցունակության ապահովման ոլորտում պաշտպանական արտադրանքի ստանդարտացման դերին:
Հավաքական անվտանգության պայմանագրի կազմակերպության (ՀԱՊԿ) ռազմատնտեսական համագործակցության միջպետական հանձնաժողովի 11-րդ նիստի ծրագրերի շրջանակներում հոկտեմբերի 4-ին կկայանա «Կամազ-Հայաստան» սերտիֆիկացված սերվիս-կենտրոնի բացումը, որ միտված է ՀՀ ՊՆ և այլ ուժային նախարարությունների ավտոմեքենաների վերանորոգմանը և տեխնիկական ապահովմանը:
Լուսանկարը՝ PanARMENIAN Photo-ի
