Արցախի նախագահի մամուլի խոսնակ Դավիթ Բաբայանն ասել է, որ Ադրբեջանի իշխանական կլանի թուլացման դեպքում Ալիևը չի կարողանալու այլևս օգտագործել հակահայկական գործոնը և հանրության ուշադրությունը շեղել: Նա անդրադարձել է ֆորումներից մեկի ժամանակ Ալիևի աղջկա կերպարին, որը ներկայացել է գրեթե մերկ վիճակում: «Թվում է, թե սա քաղաքական կարևորություն չունի, սակայն ունի, քանի որ մահմեդական, կովկասյան երկրում եթե հայրը չի կարողանում աղջկան սանձել, ապա դա խփում է նաև իր իմիջին և կարող է ներքին պառակտման հիմք դառնա:
Սա ցույց է տալիս, որ գերագույն գլխավոր հրամանատարը, խանը թույլ է և նույնիսկ չի կարողանում իր աղջկան հավաքել: Դուստրը գրեթե մերկ վիճակում դուրս էր եկել զինվորականների, ազգայնականների, հասարակ տղամարդկանց առաջ, ովքեր կովկասյան ավանդույթներ ունեն։ Նրանք պետք է մտածեն, թե Ալիևից ինչ թագավոր, դա նշանակում է, որ թագավորն է մերկ»,- ասել է նա և նշել, որ այս ամենը թեև նրբություններ են, բայց խորքային խնդիրներ են առաջացնում: Ադրբեջանի դիվանագիտությունը, առհասարակ` ներքին և արտաքին քաղաքականությունը, բազմաթիվ խոցելի կողմեր ունեն, որոնց մասին մեր պաշտոնյաները ու քարոզչությունը կարող են բարձրաձայնել:
Նույնիսկ համարձակորեն կարող ենք պնդել, որ Ալիևի իշխանությունն իսկական նվեր է մեզ համար, և հայկական դիվանագիտությունը, անշուշտ, ավելի արդյունավետ կօգտագործեր Ադրբեջանի ակնհայտ բացթողումներն ու սխալները, եթե ավելի ինքնուրույն, ռացիոնալ և պրոֆեսիոնալ լիներ:
Կարծում ենք` հենց դիլենտանտիզմի խնդիրն է, որ ԼՂՀ նախագահի խոսնակն իր ասելիքի մակարդակն իջեցնում է Ալիևի դստեր հագուկապի մակարդակին: Յուրաքանչյուր մեկը, եթե հատկապես պաշտոնական անձ չէ, ազատ է իր հագուկապի և վարքագծի հարցում, եթե քրեորեն հետապնդելի արարք չի կատարել: Ալիևի աղջկա արտաքին տեսքը որևէ կապ չունի ոչ ԼՂ խնդրի կարգավորման գործընթացի, և ոչ էլ նույնիսկ Ալիևի ռեժիմի ամրության կամ բովանդակության հետ:
Արցախի իշխանությունները Բակո Սահակյանի իշխանության վիճահարույց երկարաձգումից հետո որոշակի բարդույթների մեջ են` հավանաբար գիտակցելով, որ թուլացրել են որակական սահմանագիծն իրենց և Ադրբեջանի իշխանությունների միջև: Սակայն նույնիսկ այս պարագայում հարկ է խուսափել ոչ դիվանագիտական թեմաներից` գոնե սեփական խոսքի լրջությունն ու կշիռը գնահատելու համար: Կամ էլ` որոշակի օրինաչափությամբ Երևանում և Ստեփանակերտում իշխանության մեջ հայտնվել են «տաղանդավոր» անտաղանդները:
