Հայաստանի արտգործնախարար Էդվարդ Նալբանդյանն այսօր մեկնել է Լեռնային Ղարաբաղ։ Ըստ Հայաստանի արտգործնախարարության, Նալբանդյանը հանդիպել է Լեռնային Ղարաբաղի նախագահ Բակո Սահակյանին: Հայաստանի արտգործնախարարն ու Ղարաբաղի նախագահը հանգամանալից զրույց են ունեցել Լեռնային Ղարաբաղի հիմնախնդրի խաղաղ կարգավորման գործընթացն առաջ մղելու նպատակով համապատասխան պայմանների ստեղծման ուղղությամբ Լեռնային Ղարաբաղի, Հայաստանի և ԵԱՀԿ Մինսկի խմբի համանախագահ երկրների կողմից ձեռնարկվող ջանքերի շուրջ:
Այցը պլանայի՞ն է, թե՞ առաջացել է հրատապ խնդիր, որն անհրաժեշտ է դարձրել Հայաստանի դիվանագիտության ղեկավարի այցը Ստեփանակերտ:
Մեծ հաշվով, հայկական զույգ պետությունների ղեկավարների պարբերական հանդիպումները, խորհրդակցություններն անհրաժեշտություն են` գոնե այն իմաստով, որ մեծանա Արցախի սուբյեկտայնությունը: Խնդիրը չի վերաբերում միայն բանակցային գործընթացին, մանավանդ, որ ԼՂՀ-ն, Ռոբերտ Քոչարյանի թեթև ձեռքով, դուրս է մղվել բանակցություններից ու, անկեղծ ասած, տեասանելի էլ չէ գործընթացում Ստեփանակերտի ուղղակի մասնակցության վերականգնման հեռանկարը: Արցախը սուբյեկտայնությունը վերականգնելու խնդիր ունի, առաջին հերթին, Հայաստանի հետ հարաբերություններում: Անկեղծ ասած, այնպիսի տպավորություն է, որ Արցախի ղեկավարությունը միայն պոստֆակտում է տեղեկանում բանակցությունների արդյունքների, ձեռք բերված պայմանավորվածությունների մասին: Եթե Նալբանդյանի այսօրվա այցը Ստեփանակերտ տեղավորվում է ԼՂՀ սուբյեկտայնությունն ընդգծելու համատեքստում, ապա ողջունելի է:
Սակայն հնարավոր է, որ Նալբանդյանին Ստեփանակերտ է տարել հրատապ խնդիր, մանավանդ, որ այցն անմիջապես հաջորդում է Պուտին-Ալիև հանդիպմանը, որի լուսաբանման հարցում լրատվանիջոցները ժլատ գտնվեցին: Գուցե Հայաստանի իշխանություններն ավելի շատ տեղեկատվության են տիրապետում ու ունեն որոշակի մտահոգություններ, որոնք անհրաժեշտ են համարել կիսել ԼՂՀ ղեկավարության հետ:
Չի բացառվում նաև, որ Երևանը Ստեփանակերտից ակնկալում է ինչ-որ նախաձեռնության ցուցաբերում, որը կարող է ազդեցություն ունենալ կարգավորման գործընթացի վրա:
Դիվանագիտական հանդիպումները հենց նրանով են առանձնահատուկ, որ անցնում են դռնփակ ռեժիմով և դրանց արդյունքները տեսանելի են լինում ավելի ուշ` դրսևորվելով հրապարակային առիթների միջոցով: