Հայաստանի Հանրապետության զինդատախազ, գլխավոր դատախազի թեկնածու Գևորգ Կոստանյանը այսօր ԱԺ խմբակցությունների հետ հանդիպումների շրջանակում քննարկումներ է ունեցել նաև ԲՀԿ խմբակցության պատգամավորների հետ: Լրագրողների հետ ճեպազրույցում Զոհրաբյանը նշեց, որ դատախազի թեկնածուին իրենց խմբակցության պատգամավորների կողմից տրվել են տարբեր հարցեր, ճշտվել է նրա վերաբերմունքը տարբեր հարցերի նկատմամբ:
«Ես այս պահին նպատակահարմար չեմ գտնում իմ գործընկերների հնչեցրած հարցերին անդրադառնալ, կարող եմ ասել այն, ինչ ինձ էր հետաքրքրում՝ արդարության ճգնաժամ իրավապահ համակարգում՝ հատկապես դատախազական, հաշվի առնելով նախորդ փորձերը»,- ասաց նա՝ նշելով, որ իրեն հետաքրքիր էր՝ ինչպե՞ս է Կոստանյանը վերաբերվում քաղաքական պատվերներին, մասնավորապես՝ Վարդան Օսկանյանի հանդեպ և այլն: Բարձրացված հարցերի վերաբերյալ դատախազի թեկնածուի դիրքորոշումներն ու մոտեցումները ճշտելու համար Զոհրաբյանը խորհուրդ տվեց դիմել իրեն՝ Կոստանյանին:
«Մենք պատասխանները լսեցինք, երկուշաբթի էլ կլինեն քննարկումներ, հիմա էլ, ըստ էության, որոշակի պատասխաններ ստացանք, բայց թույլ տվեք քննարկումներ լինեն՝ հետո: Ես կարծում եմ՝ դրանց արդյունքում մենք կունենանք մեկ միասնական որոշում»,- ասաց Զոհրաբյանը:
