«Առաջին լրատվական»-ի զրուցակիցն է ՌԱՀՀԿ տնօրեն Մանվել Սարգսյանը։
– Պարոն Սարգսյան, Արցախի Ժողովրդական կուսակցությունն ու «Ազատ հայրենիքը» նախագահի պաշտոնում առաջադրել են Բակո Սահակյանի թեկնածությունը։ Մենք սրանով կարո՞ղ ենք արդեն վստահաբար նշել, որ Արցախում սահմանադրական փոփոխություններն անցկացվեցին Բակո Սահակյանի իշխանությունը երկարաձգելու համար։
– Շատերն են պնդում, որ Արցախում սահմանադրական փոփոխություններ իրականացնելու նպատակը հենց դա էր։ Սահմանադրությունն արգելում էր երկու անգամից ավելի առաջադրվել։ Ըստ երևույթին, արեցին այնպես, որ այդ արգելքը Բակո Սահակյանի համար վերանա, որովհետև ուրիշ պատճառ դժվար է գտնել սահմանադրական փոփոխություններ իրականացնելու համար՝ զուտ քաղաքական նպատակներ իրականացվեցին։ Երբ այդ փոփոխություններն իրականացնում էին՝ սկզբում բոլորովին այլ պատճառաբանություն էին բերում, այլ մոդել էր նախատեսվում, վերջում բոլորովին այլ բան ստացվեց։
– Այո՛, նշում էին, որ Արցախի Սահմանադրությունը պետք է հարմարեցվի Հայաստանի Սահմանադրությանը, ու այնտեղ ևս խորհրդարանական կառավարման համակարգ հաստատվի։
– Այո, այդպես էր նշվում, հետո պարզվեց, որ այդ ամենը բլեֆ է։ Որոշվեց, որ անցումային փուլի համար ևս երեք տարով երկարաձգվելու է նրա իշխանությունը։ Շատերը դա վտանգավոր քայլ են համարում. փաստորեն անգամ ժողովուրդը չի ընտրելու, խորհրդարանն է ընտրելու։ Բացարձակ պատասխանատվություն չկա պետության և ժողովրդի առաջ, ինչ ուզում՝ անում են։
– Կարծում եք՝ ապրիլյան պատերազմը այս փոփոխության հետ որևէ կապ ունե՞ր իրականում, հիմնականում նշվում է, որ այս փոփոխությունների կարիքը պատերազմից հետո է զգացվել։
– Այդ ամենը պարզապես օգտագործվեց, եթե չլիներ, միևնույն է՝ անելու էին իշխանությունը երկարաձգելու համար։
– Հայաստանում լավ կավ վատ ընդդիմադիր ուժեր են առաջադրվում, պայքարի մեջ մտնում, Արցախում դա կարծես առհասարակ բացակայում է՝ բացառությամբ մեկ-երկուսի։ Սա իր մեջ վտանգներ պարունակո՞ւմ է։
– Իհարկե, վտանգավոր է։ Այսօրինակ հարցերը պետք է լայն քննարկման առարկա դառնային, կարծիքներ հնչեին, բայց ի՞նչ է նշանակում, որ մի խումբ մարդիկ որոշում են ու նման քայլերի դիմում։
– Տեսակետ կա, որ Բակո Սահակյանը հարմար է նաև Սերժ Սարգսյանին. եթե հանկարծ Արցախը վերադառնա բանակցությունների սեղանին, Սահակյանը Սարգսյանից տարբերվող դիրքորոշում այս հարցի շուրջ չի ունենա։
– Հայաստանում ոչ ոք նման խնդիր նույնիսկ չի էլ դնում։ Արցախի հարցում դիվանագիտական մոտեցում չի ցուցաբերվում, քայլեր չեն արվում այդ ուղղությամբ։
