Հայաստանի և Արցախի արտակարգ իրավիճակների նախարարությունները գործում են որպես միասնական համակարգ: Ազգային ժողովի պաշտպանության և անվտանգության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում ՀՀ 2016թ. պետական բյուջեի կատարման հաշվետվության քննարկման ժամանակ այս մասին ասաց ՀՀ արտակարգ իրավիճակների նախարար Դավիթ Տոնոյանը՝ պատասխանելով ԱԺ ՀՀԿ խմբակցության պատգամավոր Միհրան Պողոսյանի հարցին: «Արցախն ու Հայաստանն աշխարհաաղետային նույն գոտում են գտնվում: Աղետները, արտակարգ իրավիճակները քաղաքական քարտեզ չեն հասկանում: Քանի որ քաղաքական սահմաններ Հայաստանի և Արցախի միջև չկա, մենք որպես միասնական համակարգ ենք գործում»,- ասաց նախարարը:
Պատգամավորին նաև հետաքրքրում էր, թե ի՞նչ փուլում է գտնվում վաղ ազդարարման համակարգերի արդիականացման հարցը: Նախարարը պատասխանեց, որ համակարգն այսօր արդիականացվում է շչակների տեղադրման, ինչպես նաև նորագույն տեխնոլոգիաների, այդ թվում` ռադիո և հեռախոսակապի կիրառման շնորհիվ: Դավիթ Տոնոյանի խոսքով՝ սահմանային բնակավայրերում համակարգերի արդիականացումը գտնվում է իրենց ուշադրության կենտրոնում:
