Ադրբեջանում մինչ այժմ ձևավորված «ընտրական ավանդույթի» համաձայն, իշխանությունը ստիպված էր լինում հաշտվել ընդդիմության մի մասի հաղթանակի հետ` դրանով ժողովրդավարական ընտրությունների իմիտացիա ստեղծելով, բայց նոյեմբերի 7-ի ընտրություններում իշխանությունն ընտրվելու հնարավորություն չտվեց իրական ընդդիմության անգամ մեկ անդամի,- գրում է «Ենի Մուսավաթ» թերթը:
Թերթի հետ զրույցում «Արևելք-Արևմուտք» հետազոտությունների կենտրոնի նախագահ Արաստուն Օրուջլուն շեշտել է, որ ընտրությունների նման արդյունքը վաղուց էր հայտնի, քանի որ 2005-ի խորհրդարանական ընտրությունները կեղծելուց և մարդկանց բողոքները ճնշելուց հետո իշխանությունը ոչ մի լուրջ ներքին և արտաքին դատապարտման չի հանդիպել: «Դրանից հետո իշխանությունն անհոգ դարձավ: Նույն հանգստությամբ նա անցկացրեց 2008 թ. նախագահական ընտրությունները և 2009-ի հանրաքվեն: Հետո իշխանությունը որոշեց, որ անհրաժեշտ է երկրում այլընտրանքային քաղաքական համակարգ ստեղծել: Նոյեմբերի 7-ի խորհրդարանական ընտրություններն այդ ծրագրի իրագործման ուղղությամբ կատարվող քայլերի բաղադրիչ մասն են: Իշխանությունը նոյեմբերի 7-ի ընտրություններն էլ անցկացրեց նախկին ավանդույթի համաձայն: Բայց այն աստիճանի համընդհանուր կեղծարարություն թույլ տվեց, որ Արևմուտքը սկսեց արձագանքել, ընդդիմությունն էլ` միավորվել: Գործընթացը սկսեց շրջվել իշխանության դեմ: Իշխանության անսահման վստահությունն ու հանգստությունը պատճառ դարձան իր իսկ դեմ գործընթաց սկսելու համար»,- եզրահանգել է նա:
Turan տեղեկատվական գործակալության տնօրեն Մեհման Ալիևի կարծիքով, իշխանությունների` 2010 թ. խորհրդարանական ընտրություններն այսկերպ անցկացնելու մեջ ոչ մի զարմանալի բան չկա. «Իշխանությունը տնտեսական ոլորտում և մարդու իրավունքների բնագավառում հասարակությանը դիմակայելու գիծ է բռնել, ինչը վերջին խորհրդարանական ընտրություններում էլ ավելի կոշտ կերպով է դրսևորվել: Եթե մինչ այժմ, խորհրդարան թողնելով մի քանի ընդդիմադիրի, իշխանությունը ցանկանում էր մասնատել ընդդիմությանը, ապա այս անգամ որոշել է իսպառ վերացնել ընդդիմության գոյությունը խորհրդարանում: Իշխանությունը գնալով համոզվում է, որ համընդհանուր կեղծարարությունը ոչ մի լուրջ հակազդեցության չի արժանանալու: Այդ պատճառով էլ նման հանգիստ ընտրություններ է անցկացնում»,- նկատել է Turan-ի տնօրենը:
