ՀՀ Ազգային ժողովի նորանշանակ նախագահ, նախկին գումարման խորհրդարանում ՀՀԿ խմբակցության պատգամավոր Արա Բաբլոյանը լուրջ ֆինանսական կարողություններ ունի դիզած: Նրա հայտարարագրերում կարելի է հանդիպել այնպիսի դրամական արժույթների, որոնք այլ պաշտոնյաների հայտարարագրերում հազվադեպ հանդիպողներից են:
Մասնավորապես, 2016 թվականի հարկային տարվա ընթացքում Բաբլոյանի կարողությունների մեջ եղել է 7 հազար շվեյցարական ֆրանկ, որը հարկային տարվա ավարտին փոփոխության չի ենթարկվել: Չեն նվազել կամ ավելացել նաև Բաբլոյանի դոլարները և եվրոները: Հարկային տարվա ընթացքում նա ունեցել է 9 հազար 500 եվրո եւ 27 հազար 250 ԱՄՆ դոլար:
Ֆրանկներին, եվրոներին եւ դոլարներին զուգահեռ՝ Բաբլոյանը ակտիվ ծախսեր է կատարել ՀՀ դրամով: Հարկային տարվա սկզբին եղած մոտ 38 մլն դրամից տարվա ավարտին մնացել է 18 միլիոնը:
Բաբլոյանի եկամուտներն, ըստ հայտարարագրի գոյացել են աշխատավարձից, տրված փոխառույթների դիմաց ստացված տոկոսներից և վարձակալության դիմաց ստացված վճարներից:
armtimes.com-ի հաղորդմամբ՝ 2017 թվականի փետրվարին ներկայացրած հայտարարագրի համաձայն, Արա Բաբլոյանը չունի մեքենա, բնակարան և այլ շարժական կամ անշարժ գույք: Կարելի է մտածել, որ Բաբլոյանը ֆրանկների, միլիոնների մեջ լողալով հանդերձ` անօթևան է:
Մանկաբույժ Արա Բաբլոյանը հարուստ է նաև գիտական ոլորտում: Նա 3 գյուտի, 7 մենագրության, 200-ից ավելի գիտական հոդվածի հեղինակ է:
Մանրամասները՝ armtimes.com-ում
