Ֆրանսիայի նախագահի ընտրությունների առաջին փուլը տեղի կունենա այս կիրակի՝ ապրիլի 23-ին: Առաջատար թեկնածուներն են՝ «Հանրապետականներ» կուսակցության կողմից առաջադրված Ֆրանսուա Ֆիյոնը, աջ-ծայրահեղական «Ազգային ճակատի» առաջնորդ Մարին Լե Պենը, Ֆրանսիայի էկոնոմիկայի նախկին նախարար, անկախ թեկնածու Էմանուել Մակրոնը, սոցիալիստ Բենուա Ամոնը, ձախակողմյան Ժան-Լյուկ Մելանշոնը: Այս գործիչների մեծ մասը վերջին օրերին հայտարարություններ են արել Հայաստանի, հայկական հարցերի մասին՝ խոսելով Հայոց ցեղասպանության, ղարաբաղյան հարցի, Հայաստանին վերաբերող այլ խնդիրների մասին: Ֆրանսահայ կազմակերպությունները, սակայն, այս թեկնածուներից որևէ մեկին առայժմ աջակցություն չեն հայտնել, «Առաջին լրատվական»-ի հետ զրույցում տեղեկացրեց Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանը:
Մեր զրուցակցի խոսքերով՝ բոլոր թեկնածուներն էլ ընդհանուր առմամբ լավ տպավորություն են թողնում, բայց մամուլում արված մի քանի տող հայտարարությունները, այն էլ՝ հայկական ամսագրի կազմակերպած հարցազրույցների ընթացքում, բավարար չեն հայկական գաղութի համակրանքը շահելու համար: Նախագահի ընտրություններին մասնակցող թեկնածուներից որևէ մեկը, ըստ Մուրադ Փափազյանի, իր անցյալով, իր գործունեությամբ չի փաստել, որ ինքը հայամետ գործիչ է՝ ի տարբերություն գործող նախագահ Ֆրանսուա Օլանդի, և բավական ճիգ չի գործադրել՝ համոզելու հայ համայնքին և շահելու հայերի ձայները: Բայց այս դիրքորոշումը վերաբերում է միայն առաջին փուլին: Ընտրությունների հաջորդ օրը՝ ապրիլի 24-ին, կազմակերպելու են ցույց, որին մասնակցելու է նաև նախագահ Օլանդը: Հենց այդ միջոցառման ընթացքում երկրորդ փուլ անցած թեկնածուների վարքագիծը, հայտարարությունները կօգնեն հայ համայնքին կողմնորոշվելու, թե ում պիտի աջակցեն երկրորդ փուլում:
«Նախագահի թեկնածուներն անձնապես բավարար չափով չեն փաստել իրենց համակրանքը հայերի հանդեպ: Նրանք պիտի մեզ հավաքեին, ժողովներ կազմակերպեին, քաղաքական բանակցության մեջ մտնեին մեզ հետ և հստակ հայտարարություններ անեին գաղութի առջև: Հարցազրույցը, մի քանի տողերը մամուլում բավարար չեն, որպեսզի շահեն հայկական գաղութի քվեն: Ուզում եմ հիշեցնել, որ Ֆրանսուա Օլանդը, երբ ներկայացավ 2012-ին որպես նախագահի թեկնածու, արդեն 10 տարի աշխատել էր մեզ հետ, մենք իր հետ գործակցում էինք, 2001 թ. Հայոց ցեղասպանության ճանաչման հարցը եղավ նաև շնորհիվ իրեն, նա խորհրդարան տարավ ուրացման դեմ օրինագիծը, միշտ ներկա էր գտնվում ապրիլի 24-ի նախաձեռնություններին, 2017-ին հայտարարություն արեց Ղարաբաղի մասին, այսինքն՝ Օլանդը փաստել է, որ ինքն անձնապես տարել է իր կուսակցությունը դեպի պրոհայկական քաղաքականություն: Ուրեմն մենք արժանի չենք համարում հայկական քվեները ուղղել դեպի մեկ թեկնածու, բայց այս խոսքը վերաբերում է առաջին փուլին: Առաջին փուլը տեղի կունենա կիրակի օրը՝ ապրիլի 23-ին: Մինչև առաջին փուլը մենք հայտարարություններ չենք անելու: Երկրորդ փուլը տեղի կունենա մայիսի 7-ին: Առաջին փուլից մեկ օր անց ապրիլի 24-ն է: Պիտի նայենք՝ ով ներկա կլինի ապրիլի 24-ին, ինչ խոսքեր կուղղեն հայկական գաղութին: Մենք հրավիրել ենք բոլոր թեկնածուներին, որոնք հնարավորություն ունեն երկրորդ փուլ անցնելու՝ բացի Մարի Լե Պենից, որը ներկայացնում է ծայրահեղ աջ «Ազգային ճակատը»: Բոլորին ուղարկել ենք հրավեր և կտեսնենք՝ ով ինչ խոստումներ պիտի տա: Ուրեմն այս ապրիլի 24-ը կարող է անկյունաքար լինել»,- նշեց Մուրադ Փափազյանը:
Ինչ վերաբերում է կոնկրետ հայկական խնդիրներին, որոնք կարևորում է հայ համայնքը այս համատեքստում, Մուրադ Փափազյանը չհամաձայնեց, թե իրենց համար միակ կարևոր հարցը Հայոց ցեղասպանության ճանաչումն է կամ ցեղասպանության ժխտման քրեականացումը. «Ցեղասպանության հարցը չէ միայն: Կա Թուրքիայի, Ադրբեջանի պարագան, Ղարաբաղի անկախության և անվտանգության հարցը և այլ խնդիրներ»:
