Грузия Online-ի փոխանցմամբ, Human Rights Watch (HRW) միջազգային իրավապաշտպան կազմակերպության փորձագետները գիշերը Թբիլիսիի կենտրոնում ընդդիմության ցույցի ցրման ժամանակ կիրառված ուժը համարում են չարդարացված: Նրանք վրացական իշխանություններին կոչ են արել անհապաղ հետաքննություն սկսել տվյալ խնդրի շուրջ:
HRW-ի՝ Եվրոպայի ու Կենտրոնական Ասիայի հարցերով փոխտնօրեն Ռեյչել Դենբերը հայտարարել է. «Վրացական կառավարությունը պետք է անհապաղ մանրակրկիտ ու անկողմնակալ հետաքննություն ձեռնարկի չափից ավելի ու անհավասարաչափ ուժի կիրառման կապակցությամբ: Եթե անգամ այդ ցույցն արտոնված չէր, ապա խաղաղ ցուցարարներին ծեծի ենթարկելը դարձյալ արդարացված չէ: Ոստիկանները պետք է պատասխանատվության ենթարկվեն ցուցարարներին ծեծելու համար:
Միևնույն ժամանակ, կառավարությունը դրական քայլ է գործել, երբ ցուցարարներին առաջարկել է բողոքի ակցիայի անցկացման այլընտրանքային վայր: Չնայած դրան, ոստիկանությունը երբեք չպետք է ձեռնամուխ լիներ ցուցարարներին ծեծի ենթարկելուն, որոնք ոչ մի վտանգ չէին ներկայացնում»:
Հիշեցնենք, որ գիշերային ցույցի ցրման ժամանակ զոհվել է 2 ոստիկան (հատուկջոկատային), վիրավորվել է մինչև 40 մարդ, ձերբակալվել է 90 մարդ:
