Երեկ ԱՄՆ նախագահ Բարաք Օբաման Մեծ Բրիտանիայի խորհրդարանի անդամների առջև հանդես է եկել ելույթով: Նա նշել է, որ ԱՄՆ-ի և Մեծ Բրիտանիայի համաշխարհային գերակայության ժամանակը չի անցել:
Նա ասել է, որ ԱՄՆ-ն, Մեծ Բրիտանիան և նրանց արևմտյան գործընկերները, չնայած առաջ են եկել նոր գերտերություններ, շարունակում են մնալ առանցքային պետություններ, որոնք որոշում են ժամանակակից աշխարհի կարգը և հերքել է այն ենթադրությունները, թե Չինաստանի և Հնդկաստանի ակտիվ զարգացումը կարող է նվազեցնել ԱՄՆ-ի և Արևմտյան Եվրոպայի ազդեցությունը:
«Հնարավոր է՝ ինչ-որ մեկն ասի, թե այդ ազգերին է պատկանում ապագան, և մեր ժամանակն անցել է: Սակայն դա այդպես չէ: Մեր ժամանակը (գործելու.– 1in.am) հենց հիմա է»։ Օբաման հատուկ շեշտել է ժամանակակից գործընթացներում ԱՄՆ-ի և Մեծ Բրիտանիայի դերը, որոնց համագործակցությունը գործընկերների հետ թույլ է տալիս հասնելու «ներդաշնակ աշխարհակարգի»:
«Քիչ երկրներ կան, որոնք ավելի կոշտ են, ավելի բարձրաձայն են խոսում և պայքարում ժողովրդավարական արժեքների համար ամբողջ աշխարհում, քան Միացյալ Նահանգներն ու Միացյալ Թագավորությունը»,- ասել է Օբաման:
«Հենց ԱՄՆ-ը, Բրիտանիան և նրանց գործընկերներն են ստեղծել այն աշխարհը, որտեղ նոր գերտերությունները հնարավորություն ունեն բարձրանալու: Եվ թեև ավելի շատ երկրներ են իրենց վրա պարտականություններ վերցնում նոր աշխարհակարգի ձևավորման համար, հենց մեր միությունն է նոր դարում անքակտելի լինելու աշխարհում խաղաղություն, բարգավաճում և արդարություն ապահովելու մեր ընդհանուր նպատակներին հասնելու համար»,- ասել է Օբաման: