Վրաստանի Մարդու իրավունքների պաշտպան Ուչա Նանուաշվիլին հաստատում է բանտերում «նայողների» համակարգի առկայությունը, որը ստեղծվել է քրեական հեղինակությունների կողմից, սակայն նրա կարծիքով` աբսուրդային է երևույթը կապել Վրաստանի պատիժների կատարման և փաստաբանական օգնության նախարար Սոզար Սուբարիի հետ, գրում է apsny.ge-ն:
«Նայողների ինստիտուտը գոյություն է ունեցել, գոյություն ունի և հավանաբար գոյություն կունենա: «Ազգային շարժման» կողմից ոչ մի ապացույց չի ներկայացվել: Թող այդ սխեմայի գոյությունն հաստատող կոնկրետ ապացույցներ, փաստաթղթեր ներկայացնեն: Կարելի է ցանկացած հայտարարություն անել, սակայն այն պետք է ապացուցվի փաստերով, ինչը «ազգայնականների» հայտարարության մեջ ես չտեսա: Հակառակը, կարծում եմ՝ երևույթը և այն Սոզար Սուբարիի անվան հետ կապելը ամենաքիչը ծիծաղելի է»,- հայտարարել է Ուչա Նանուաշվիլին:
Օրերս Վրաստանի «Ազգային միասնական շարժումը» հրապարակել էր այն սխեման, որով քրեական հեղինակությունները վերահսկում են Վրաստանի բանտերի իրավիճակը:
