«23 տարի անց մենք մեր անկախությանը, ազատությանը բովանդակություն հաղորդելու հրամայական ունենք»,- այսօր Րաֆֆի Հովհաննիսյանի հրավիրած հանրային ժողովի ընթացքում ասաց «Բարև Երևան» դաշինքի ավագանու անդամ Ստյոպա Սաֆարյանը, ում պնդմամբ՝ մենք անկախ ենք Սահմանադրությամբ, դրոշով, հիմնով, ձևական գոյություն ունեցող ինստիտուտներով, որոնցից մեկն էլ Երևանի քաղաքապետարանն է․ «Սակայն մենք այդ ինստիտուտներին պիտի տանք այն իրական բովանդակությունը, որ պետք է ունենան, ծառայեն մեզ, ոչ թե հակառակը, որ մարդիկ չխորշեն ազատությունից ու անկախությունից, այլ հասկանան, որ իրենց բարօրության հիմնական ակունքը անկախությունն է: Տրանսպորտի ուղեվարձի թանկացումը կրկին մեր ազատության, իրավունքի հարցն էր, քանի որ հերթական անգամ ինչ-որ ֆեոդալներ որոշեցին, որ Երևան քաղաքը բիզնես-հնարավորություն պիտի ընձեռի իրենց ընտանիքների հարստացման համար: Մի օրվա մեջ իբր գծատերերը որոշեցին բարձրացնել ուղեվարձը, ժողովրդի գրպանից կորզել հիսուն դրամներ: Մեր հասարակությունը վերագտավ արժանապատվությունը և ասաց, որ այսպես չպետք է լինի»:
Նրա խոսքերով՝ «քաղաքացիական թե քաղաքական» խնդիրը շատ է շահարկվում, բայց քաղաքական ուժերն են պարտավոր գալ իշխանության, իրականացնել ծրագրերը, քաղաքացիականն այդպիսի առաքելություն չունի․ «Հիմա տարբերությունը հասկացեք ինքներդ: Այն խնդիրը, որ թեկուզ մասամբ լուծվեց մեր համաքաղաքացիների շնորհիվ, մի հաջողության գրավական ուներ, բոլորը հավատացին իրենց ուժերին, և բոլորն արեցին իրենց գործը: Թեկուզ ոչ վերջնական, այնուամենայնիվ, թեկուզ փոքրիկ արդյունքը մենք կարողացանք դնել հասարակության սեղանին: Մեր ուժը համախմբվածության, հավատի մեջ է, այն գործի, որ կատարում ենք բարեխիղճ և նվիրումով»:
Լուսանկարը` PanARMENIAN Photo-ի
