Երեկ՝ ՀՀԿ-ից Հովիկ Աբրահամյանի դուրս գալու մասին հայտարարությանը զուգահեռ, լրահոսում տեղ գտավ մի ուշագրավ տեղեկություն ևս, որը, սակայն, չարժանացավ հասարակական մեծ հնչեղության: Իհարկե այդ տեղեկությունն իր ինտրիգով մրցունակ չէր Հովիկ Աբրահամյանի հայտարարության համեմատ, սակայն, այնուհանդերձ, տեղեկությունն ուշագրավ էր և թերևս դեռ «իր խոսքը կասի» Հայաստանի նախընտրական և ներիշխանական իրադարձությունների համատեքստում: Խոսքը այն մասին է, որ երեկ տեղեկություն տարածվեց Հայաստանի հատուկ քննչական ծառայությունում «պանամական օֆշորի» հետ կապված գործը կարճելու մասին, որով անցնում էր օֆշորային այդ սկանդալի մեջ իր անունով շոշափվող ԴԱՀԿ նախկին պետ Միհրան Պողոսյանը:
Ինչպես հայտնի է, Պողոսյանն իր պաշտոնից հրաժարական տվեց այդ սկանդալից հետո: Եվ ահա հայտարարվում է, որ ՀՔԾ-ն կարճել է այդ գործով քննությունը, բնականաբար հանցակազմի բացակայության պատճառով: Ընդ որում, ուշագրավն այն է, որ հաղորդագրությունն առաջինը տարածել է ոչ թե ՀՔԾ-ն, այլ Միհրան Պողոսյանի գրասենյակը: Միհրան Պողոսյանը Սերժ Սարգսյանի մտերիմներից է, նրա ամենամեծ աջակցությունը վայելող անձանցից: Ուշագրավ է սակայն մեկ այլ հանգամանք էլ՝ Պողոսյանը հանդիսանում է Հայաստան բանանի ներկրման մենատերը, դե ֆակտո մենատերը: Այդ մասին գրում է մամուլը, թեև Պողոսյանն իհարկե հերքում է, թե կապ ունի բանանի ներկրման հետ: Իսկ բանանի ներկրման թեման «կարմիր թելի» նման անցնում է Հայաստանի նոր կառավարության ձևավորման և նոր իրավիճակի զարգացման ամբողջ կոնտեքստում, դառնալով ամենաշատ քննարկվող հարցերից մեկը:
Ընդ որում հետաքրքիր է, որ այս թեման զարգացրել է նոր կառավարությունը՝ հայտարարելով բանանի մենաշնորհը կոտրելու մասին: Եվ ահա, տարածվում է տեղեկություն այն մասին, որ Միհրան Պողոսյանը, փաստորեն, «անկոտրելի» է և ՀՔԾ-ն կարճել է նրա դեմ գործը, քանի որ բացակայում է հանցակազմը: Սա ըստ էության կանաչ լույս է Միհրան Պողոսյանի քաղաքականությամբ զբաղվելու համար, որի հավանականության մասին նա հայտարարել էր ՀՀԿ համագումարի օրը լրագրողների հետ զրույցում:
Մամուլի տեղեկությամբ՝ Պողոսյանը ռեյտինգային ընտրակարգով առաջադրվելու է Ավանի և Նոր Նորքի ընտրատարածքում: Ըստ որում, այստեղ նրա շահերը կարող են բախվել Տարոն Մարգարյանի հետ: Երևանի քաղաքապետը այստեղ փորձում է անցկացնել իր աներորդուն՝ ներկայումս պատգամավոր Ռոբերտ Սարգսյանին: Այստեղ, սակայն Պողոսյան-Մարգարյան շահերի բախումն ընդամենը դրվագ է, քանի որ Միհրան Պողոսյանի վերաբերյալ ՀՔԾ որոշման կայացման տեղեկատվության տարածումը հուշում է ներիշխանական շահերի բախման առավել լայն հեռանկարի մասին: Եվ երևի թե պատահական չէ նաև, որ տեղեկությունը տարածվում է այն ժամանակ, երբ վարչապետ Կարեն Կարապետյանը գտնվում է Մոսկվայում: Շատ հավանական է, որ Կարապետյանը այնտեղից վերադառնա որոշակի աջակցությամբ: Սերժ Սարգսյանն այստեղից ցույց է տալիս, որ բոլորովին մտադիր չէ զիջել դիրքերը և մարտի է պատրաստվում դուրս բերել Միհրան Պողոսյանին, ՀՀԿ-ի այսպես ասած՝ «նոր ոգու» շրջանակում:
