Sputnik լրատվական գործակալության փոխանցմամբ՝ ընդդիմադիր «Միասնական ազգային շարժում» (ՄԱՇ) կուսակցության խորհրդարանական խմբակցության նախագահ Նիկա Մելիան իր կուսակիցներ, ՄԱՇ պատգամավորներ Ակակի Բոբոխիձեին, Էլենա Հոշթարիային ու Սերգո Ռատիանիին մեղադրել է կուսակից Գիգի Բոկերիային անվերապահ ենթարկվելու համար։
Մելիան նախորդ շաբաթ հեռացել է ՄԱՇ-ի «գորշ կարդինալ» Գիգի Բոկերիայի ու խորհրդարանի նախկին նախագահ Դավիթ Բաքրաձեի թիմից։ Դրանից հետո թիմը որոշել է Մելիային հեռացնել խմբակցության ղեկավարությունից։
Սակայն, ՄԱՇ-ի առաջնորդ Գիգի Ուգուլավայի խնդրանքով նիստը հետաձգվել է մի քանի օրով։ ՄԱՇ-ը ներկա դրությամբ բաժանված է երկու խմբի, որոնցից մեկը գլխավորում է Բոկերիան, իսկ երկրորդ կլանը՝ Ախալայա ընտանիքը՝ երկրի նախկին նախագահ Միխեիլ Սաակաշվիլու մերձավորները։
Մելիան դասվում է վերջին խմբին։ Կուսակցությունում հակասությունները լուրջ հակամարտության վերածվեցին այն բանից հետո, ինչ նրա առաջնորդների մի մասը դեմ գնաց Սաակաշվիլու ցանկությանը։
Նրանք քվեների մեծամասնությունը հավաքեցին քաղխորհրդում՝ մասնակցելու համար խորհրդարանական ընտրությունների երկրորդ փուլին և խորհրդարանում աշխատելու համար։
Սաակաշվիլին իր նախկին կուսակիցներին մեղադրեց իշխող «Վրացական երազանք-Դեմոկրատական Վրաստան» կուսակցության հիմնադիր Բիձինա Իվանիշվիլու հետ գործարքի գնալու համար։
ՄԱՇ-ն այժմ պատրաստվում է հունվարի 20-ի համագումարին, որում վերընտրվելու է քաղխորհուրդը։ Քաղխորհրդի այն անդամներին, որոնք ներկայացնում են Բոկերիա-Բաքրաձե թիմը, արդեն իսկ հեռացրել են կուսակցության համագումարը կազմակերպելուց։
