Շարունակվում են հակասական ու իրարամերժ մնալ ՀՀ Սննդամթերքի անվտանգության պետական ծառայության Անասնաբուժության տեսչության պետ Հովհաննես Մկրտչյանի և Տավուշի մարզի Վազաշենի գյուղապետ Լորիկ Բադիրյանի տեղեկությունները գյուղում արձանագրված խոզերի անկման մասին:
«Պատճառը անհայտ մնաց: Խնամքը՝ ուրիշ բան չկա այստեղ, ո՛չ հիվանդության հարուցիչ հայտնաբերվեց, ո՛չ էլ կերի մեջ որևէ բան գտանք: Եթե հիվանդություն չկա և կերից չէ, ուրեմն մնում է միայն պահվածքը»,- «Առաջին լրատվական»-ին ասաց ՀՀ Սննդամթերքի անվտանգության պետական ծառայության Անասնաբուժության տեսչության պետ Հովհաննես Մկրտչյանը:
«Չիմացանք՝ ինչից էր, ոնց որ գաղտնիք են պահում, ինչ են անում»,- խոզերի անկման պատճառի մասին ասաց սահմանամերձ Վազաշենի գյուղապետը:
Հովհաննես Մկրտչյանը «Առաջին լրատվական»-ի հետ նախորդ զրույցում հերքել էր, թե տեսել է խոզերի գերեզմանոցը: Այս անգամ՝ տեսել էր:
«Որպես այդպիսին, խոզերի գերեզման ցույց է տվել գյուղապետը, ասել է՝ սա գերեզման է, բայց թե դրա տակ ինչ կա՝ ինքը խուսափում է պատասխանել: Փորձել ենք քանդել, հասկանալ՝ ինչ կա: Մի քանի հատ մանր խոճկորների դիակ կարող է լինել, որ մենք տեղյակ ենք՝ երկու-երեք հատ անկում է եղել, որից էլ մենք նմուշ ենք բերել և հետազոտել»,- ասաց Անասնաբուժության տեսչության պետը:
Գյուղապետ Լորիկ Բադիրյանը պնդում է, որ խոզերի գերեզմանոցը Անասնաբուժության տեսչությունից են եկել ախտահանել՝ հատ-հատ:
Նրա խոսքով՝ առաջին ակտով 150 գլուխ տարբեր սեռահասակային խմբի խոզեր են անկել:
Հովհաննես Մկրտչյանի ձևակերպմամբ՝ անհնար է՝ 150 գլուխ լինի:
«Դա կարող է լինել մի քանի մանր խոճկոր, որոնք ավելի թույլ են, տկար որևիցե բանի նկատմամբ, կարող է պահվածքի, խնամքի մեջ խախտում լինի, ինչի պատճառով էլ՝ անկում»,- ասաց Հովհաննես Մկրտչյանը: Ըստ նրա՝ անկած խոզերի թիվը դժվար է հաշվել, որովհետև անտառային պահվածք է, մարդիկ համայնքի ծխամատյաններում իրենց անվան դիմաց չունեն կոնկրետ գրանցված խոզերի քանակ:
Անասնաբուժության տեսչության պետի տվյալներով՝ մարդիկ անտառում խոզ ունեն՝ քանակից տեղյակ չեն:
Դեպքի հետ կապված փորձաքննությունը դադարեցված է:
Գյուղապետ Բադիրյանը տեղեկացրեց, որ արդեն մեկ շաբաթ է՝ անկում չկա, հետո ավելացրեց. «Երևի շուտով ավարտվի, առ այսօր մի փոքր անկումներ ենք ունեցել, որի պատճառով դրանք հարկադիր սպանդի են ենթարկվել»:
