Այսօր ՀՀ սփյուռքի նախարարությունում տեղի ունեցավ Սփյուռքի երիտասարդների «Արի տուն» հայրենաճանաչության 2013թ. ծրագրի վեցերորդ փուլի բացման հանդիսավոր արարողությունը: Ծրագրի այս փուլում Հայաստան կժամանի շուրջ 120 մասնակից՝ 15 երկրներից, այդ թվում՝ ԱՄՆ-ից, ՌԴ-ից, Վրաստանից, Բելառուսից, Ֆրանսիայից, Չեխիայից, Ղրղըզստանից, Լիբանանից և այլն: «Արի տուն» ծրագրի մասնակիցներն առաջիկա երկու շաբաթների ընթացքում հնարավորություն կունենան այցելել Հայաստանի տեսարժան վայրեր:
Այսօր «Էրեբունի պլազա» բիզնես-կենտրոնում նրանք իրենց շնորհակալական խոսքը հայտնեցին Հայաստանը ճանաչելու հնարավորություն ընձեռելու համար: Նրանց բաժանվեցին պայուսակներ, շապիկներ և գլխարկներ, որոնք պետք է կրեն առաջիկա երկու շաբաթների ընթացքում:
«Առաջին լրատվական»-ը զրուցեց Հայաստան առաջին անգամ ժամանած երիտասարդների հետ, որոնք արդեն երկու օր է՝ Երևանում են և հասցրել են ծանոթանալ Երևանի գեղատեսիլ վայրերին և իրենց հայրենակիցներին: Նրանցից ոմանք հասցրել էին հայաստանաբնակների հետ զրույցներից հասկանալ, որ աշխատանք չկա, ուսման խնդիրները շատ են, աղքատության մակարդակը շատ բարձր է, և երկրից արտագաղթում են: Սակայն նրանք նշում էին, որ չեն հասկանում այն անձանց, ովքեր Հայաստանը լքելու և այլ ափերում սոցիալական ապահովություն փնտրելու որոշում են կայացնում: Նրանց խոսքով՝ պետք է Հայաստանում ապրել և փորձել այդ դժվարությունները հաղթահարելով՝ նոր իրավիճակ ստեղծել, քանզի Հայաստանն իսկապես դրախտ է:
