Երեկ, ելույթ ունենալով պետքարտուղարության աշխատակիցների առջև, ԱՄՆ նախագահ Բարաք Օբաման ներկայացրել է ԱՄՆ արտաքին քաղաքականության փոփոխությունները, որոնք վերաբերում են ԱՄՆ-արաբական երկրներ հարաբերություններին:
Մենք արդեն նշել ենք այն հիմնական ուղղությունները, որոնք ներկայացրել էր Օբաման: Նրա ելույթի կարևորագույն կետերից է եղել անդրադարձը արաբա-իսրայելական հակամարտությանը: «Վերջին շրջանում Մերձավոր Արևելքի վրա իջել է արաբա-իսրայելական հակամարտության շողքը: Իսրայելցի երեխաները վախենում են, որ իրենք կմահանան պայթեցվող ավտոբուսներում կամ հրթիռակոծության ժամանակ: Պաղեստինցիներն էլ տառապում են օկուպացիայից և իրավունքների խախտումից: Իմ վարչակազմը ամիսներ է ծախսել այս հակամարտությանը լուծում գտնելու համար: Արդյունքը հետևյալն է. բնակավայրերը շարունակում են կառուցվել, իսկ պաղեստինցիներն էլ շարունակում են գրոհել: Շատերն ասում են, թե խաղաղ գործընթացը մտել է փակուղի, սակայն ես դրա հետ համաձայն չեմ»,- ասել է Օբաման:
Օբաման հատուկ շեշտել է, որ Իսրայելի հետ հարաբերությունները ժամանակի փորձություն են անցել, սակայն պետք է արդար լինել և ասել, որ Իսրայելը չի կարող նման քաղաքականություն վարել: «… դրա հետևանքով հարյուրհազարավոր պաղեստինցիներ անարդարություն են զգում իրենց նկատմամբ և ապրում են աղքատության մեջ: Հրեական ժողովրդավարության մասին երազանքը չի կարող իրականություն դառնալ օկուպացիայի հաշվին»,- ասել է Օբաման:
Նա ասել է, որ Իսրայելը պետք է վերադառնա 1967 թ. սահմաններին՝ միաժամանակ հնարավորություն ունենալով պաշտպանել ինքն իրեն հարձակումներից և ահաբեկչական գործողություններից: Իսկ պաղեստինցիներն էլ պետք է ստեղծեն կենսունակ պետություն՝ իմանալով սեփական պետության սահմանները: «Երկարատև խաղաղությունը հնարավոր է միայն երկու ժողովուրդների համար երկու պետություն ստեղծելու դեպքում: Իսրայելը՝ հրեաների, իսկ Պաղեստինը՝ պաղեստինցիների: Այսպիսով պարզ է դառնում բանակցությունների թեման՝ անվտանգ դարձնել Իսրայելը և ստեղծել Պաղեստինի պետություն»,- նշել է ԱՄՆ նախագահը:
Նա առաջարկել է հետագային թողնել մի շարք հարցերի լուծումը, այդ թվում՝ Երուսաղեմի կարգավիճակի և փախստականների: Իսրայելը պետք է հասկանա, որ հրեական պետության ճանաչումը պետք է սկսվի տարածքների հարցում լոյալության դրսևորմամբ, իսկ «Ֆաթհ»-ն ու «Համաս»-ը պետք է ճանաչեն Իսրայելի՝ որպես պետության գոյության իրավունքը:
