Գազի և էլեկտրաէներգիայի նոր սակագնի հաստատումից անմիջապես հետո Գյումրիում 10-30 դրամով թանկացավ նաև հացը: «Շիրակ կենտրոն» ՀԿ-ի նախագահ Վահան Թումասյանը հացի գնի թանկացումից տեղյակ չէ, բայց նշեց, որ նախօրեին Գյումրիում հաց չի եղել, ենթադրում է, որ Վարդավառով էր պայմանավորված:
Տավուշի մարզի Կոթի գյուղի խանութպաններից մեկը նշեց, որ թեև հացի թանկացում չկա իրենց մոտ, բայց դրա փոխարեն թանկացել են հանքային ջրերն ու հյութերը՝ 10-20 դրամով: Նույն մարզի Կողբ գյուղում մթերային խանութի վաճառողուհի Մարինեն ասաց, որ վերջին երկու օրում թանկացում չի եղել, բայց վերջերս թանկացել է կաթնամթերքը՝ 50 դրամով:
«Թե՛ Երևանում, թե՛ մարզերում թանկացման տոկոսը նույնն է, քանի որ իրացման ծախսի հավելյալ վճարը երկու տեղում էլ նույն տոկոսաչափն է կազմում: Եթե Երևանում իրացման ծախսը 20 դրամ էր, մարզերում՝ 30, հիմա էլ է Երևանում 20 դրամ, մարզերում՝ 30»,- տեղեկացրեց «Իրազեկ և պաշտպանված» ՀԿ-ի նախագահ Բաբկեն Պիպոյանը: Նա նշեց, որ ինքը դեռ մեկ ամիս առաջ էր կանխագուշակել այս թանկացումները: Կաթնամթերքի շուկայում թանկացումներ եղան, քանի որ, ըստ նրա, չկար վերահսկողություն: Կաթնամթերք արտադրող ընկերություններից մեկը սկզբում չբաձրացրեց արտադրանքի գինը: Սա ապացուցում է, որ կարող էին մյուս ընկերությունները ևս չբարձրացնել կաթնամթերքի սակագինը:
«Հետագայում նաև այս ընկերությունը թանկացրեց արտադրանքի գինը: Երբ տեսավ, որ մյուս ընկերությունները թանկացնում են՝ ոչ մի բան չի լինում իրենց, էս դեպքում ի՞նչն է խանգարում, որ թանկացնի: Բա կթանկացնի, բա ինչ կանի: Սպառողական շահերից ելնելով՝ արտադրողի գործոնը հանուն սպառողի՝ չկա»,- փաստեց Բաբկեն Պիպոյանը:
Ինչ վերաբերում է մնացած ապրանքատեսակների թանկացմանը, ապա, նա կարծում է, որ այստեղ ի սկզբանե պետք է լինի հանրային մեծ ճնշում, որպեսզի արտադրող ընկերությունները հասկանան, որ պետության ուշադրության կենտրոնում հայտնվելն ուղղակի տնտեսապես ձեռնտու չէ:
«Այս դեպքում եթե հանրային ճնշման գործոնը եղավ, իհարկե ոչ 100 տոկոսով, ապա պատկան մարմինների ճնշումը չեղավ: Արտադրողին կաշկանդող հանգամանքը՝ գնային թանկացումից խուսափելու, չկար: Եթե մենք այսօր մասնավոր մի քանի դեպք ենք նկատում փոքրիկ տոկոսներով, ապա դա շարունակելու դեպքում ավելի վատ վիճակ ենք արձանագրելու»,- վստահեցրեց «Իրազեկ և պաշտպանված» ՀԿ-ի նախագահը:
Նա կանխատեսում է, որ նույն սկզբունքով ոչ միայն հացը, այլ նաև օրինակ՝ երշիկը կարող է թանկանալ, որովհետև, ըստ Բաբկեն Պիպոյանի, համապատասխան մարմինների և հանրության ամբողջական ճնշում չկա:
Առաջին թանկացումները եղան կաթնամթերքի ոլորտում այն պարագայում, երբ հումքի՝ կաթի մթերման գինը նվազեց: Կաթնամթերք արտադրողները գինը թանկացրին 8-12 տոկոսով, դեպքեր եղան, որ որոշ փոքր արտադրատեսակներ մինչև 15 տոկոսով թանկացան:
«Փաստն ինքնին անհանգստացնող է: Եթե տնտեսվարողներին ապրանքը թանկացնելուց հետո ոչ մի վտանգ չի սպառնում, ի՞նչը պետք է խանգարի իրենց թանկացնել ապրանքը, խի՞ղճը»,- մտահոգություն հայտնեց Բաբկեն Պիպոյանը:
