Հայ ազգային կոնգրեսի մաս կազմող «Ժողովրդավարական հայրենիք» կուսակցության նախագահ Պետրոս Մակեյանը, անդրադառնալով Ռոբերտ Քոչարյանի` Իրանի նախագահի հատուկ բանագնաց, ԱԳ փոխնախարար Մոհամադռեզա Ռաուֆ Շեյբանի հետ հանդիպմանը, հայտարարեց, թե ՀՅԴ-ի հետ համատեղ Քոչարյանը «վա-բանկ» է գնում: «Պարզ է, որ Արևմուտքից ձեռ է քաշել, միայն Ռուսաստանը բավական չէ, և ինքը հիմա գործարքի համար ուղիղ կապի մեջ է մտել Իրանի և ՀՅԴ-ի հետ: Սա հին արմատներ ունի, նոր երևույթ չէ: Սակայն այն ժամանակ նա խաղալու հնարավորություն ուներ` ռուսների հետ էր հարաբերություններ փորձում ստեղծել, ռուսներն օգտագործում էին նրան` Արևմուտքի հետ խաղում: Բայց հիմա տպավորություն է, որ բոլոր դռները փակվում են, և միայն ՀՅԴ-ի ու Իրանի դուռն է կիսաբաց»,- հայտարարեց Մակեյանը:
Թե որքանով նրան կհաջողվի խցկվել այդ կիսաբաց դռնից ներս, Մակեյանը նշեց. «Իմանալով Քոչարյանի տեսակը, կարող եմ ասել, որ նա էությամբ վախկոտ է: Նա վա-բանկ գնում է, երբ երաշխիքներ է ստանում: Նա մարտի 1 չէր անի, եթե երաշխիքներ չունենար, ապրիլի 12 չէր անի, եթե երաշխիքներ չունենար, հոկտեմբերի 27-ին «անթրաշ» չէր լինի, եթե երաշխիքներ չունենար: Իսկ Իրանը, կարծում եմ, այն երկիրը չէ որ իրեն կարողանա երաշխիքներ տալ: Հիմա Իրանն ու Իրանի նախագահն իրենք լրջագույն խնդիրներ ունեն, քանի որ արաբական հեղափոխությունների ալիքը մտնում է արդեն Իրան»: Մակեյանը համոզված է, որ Քոչարյանը Հայաստանում այլևս անելիք չունի:
