«ՀՀ Ընտրական օրենսգրքում փոփոխություններ և լրացումներ կատարելու մասին» նախագծի քննարկման ժամանակ ԱԺ պետաիրավական հարցերի մշտական հանձնաժողովի նախագահ Հովհաննես Սահակյանն այսօր Ազգային ժողովում նշեց, որ որևէ մի հարցադրում առանց պատասխան չի մնացել, և որ ընդդիմության առաջարկած հինգ հարցերից չորսի դեպքում ունեն կատարյալ համաձայնություն, ինչի մասին խոսել են ընդդիմադիր գործընկերները:
Հ. Սահակյանի գնահատմամբ, բացի չորս կետերից, որի շուրջ համաձայնության են եկել, ամեն ինչի մասին խոսվեց. «Ինչից ասես չխոսեցինք. էլ Արցախից, էլ մոսկվաներից, էլ չգիտեմ գնացել ենք Մոսկվա, Արցախի հարցն էր, պետք է գնդակահարենք, խփենք: Ապրիլյան պատերազմի ժամանակ, երբ մեր գործընկերները սահմանում էին, ձեր ղեկավարները օվկիանոսից այն կողմ էին, նույնիսկ Հայաստանում չէին, հիմա եկել եք այստեղ մոսկվաներից եք խոսում»,-ասաց նա և նշեց, որ իր տպավորությամբ, նրանց, որոնց ստորագրությունը համաձայնության տակ չկա, նրանք փորձում են ամեն ձև վիժեցնել այս գործընթացը:
«Այդ ստորագրման արարողության ժամանակ խոսում էինք աննախադեպ վստահության հիմնաքարի մասին, որ պետք է նշվի, շամպայններ պետք է պայթեցնեինք, խմեինք, նշեինք, շնորհավորում ենք մեկս մյուսին… ընդամենը մեկ գիշերը տևեց:
Չգիտեմ՝ վատ երազ տեսաք, արթնացաք, թե ինչ արեցիք, դրանից հետո տրամաբանությունը փոխվեց: Ընդդիմադիր դաշտում լոկոմոտիվի դերը ստանձնելու ձեր մոլուցքը հանգեցրել է նրան, որ ուրիշ բան ենք քննարկում»,- ասաց Հովհաննես Սահակյանը:
Մանրամասները՝ տեսանյութում:
