Ադրբեջանը կողմ է հակամարտության կարգավորման միայն փուլային տարբերակին՝ հայտարարել է Ադրբեջանի նախագահ Իլհամ Ալիևը՝ երկրի զիվորականների հետ ամփոփելով հունիսի 20-ին Սանկտ Պետերբուրգում տեղի ունեցած Պուտին-Ալիև հանդիպումը: Այս տարբերակին, սակայն, դեմ է են Հայաստանի իշխանությունները, նրանք նշում են, որ մեզ համար հակամարտության կարգավորման փաթեթային տարբերակն է ընդունելի:
Թեմայի շուրջ «Առաջին լրատվական»- ի հետ զրույցում իր դիտարկումները ներկայացրեց Միջագային և անվտանգության հարցերի հայկական ինստիտուտի հիմնադիր, փորձագետ Ստեփան Սաֆարյանը:
Նրա կարծիքով՝ ապրիլյան պատերազմից հետո նկատելի էր, որ վերադարձ է լինելու 2011թ. Կազանյան փաստաթղթին, որի մերժողը եղել է Ադրբեջանը:
«Ես կարծում եմ, որ այն հարցը, որ Ադրբեջանը բերել է օրակարգ, կեղծ հարց է, որովհետև խնդիրն այն է, որ Ադրբեջանը բացահայտ հայտարարել է, որ ԼՂՀ կարգավիճակի հարցն իր համար փակ հարց է: Փորձագետի դիտարկմամբ՝ այս հունով բանակցությունները շարունակելն անիմաստ է:
Այն, ինչ Ադրբեջանն անվանում է փուլային տարբերակ, դա այսպես ասած, փուլային դեօկուպացիան է, դրա դիմաց ոչինչ չի տրվում: Ադրբեջանը փուլային տարբերակ ասելով՝ նկատի չունի փուլային լուծում, նկատի չունի զիջումներ նաև Ադրբեջանի կողմից»,- նշեց փորձագետը:
Անդրադառնալով Լավրով-Պուտին միջանկյալ լուծման տարբերակին, որի համաձայն՝ 5 շրջան վերադարձվում է Ադրբեջանին, իսկ ԼՂՀ կարգավիճակի հարցը առկախված է մնում, Ս. Սաֆարյանն ասաց. «Դա շարունակում է մնալ Ռուսաստանի կողմից բերված վերջին առաջարկը: Այս պլանի իրական էությունը ղարաբաղյան խնդիրը լուծելը չէ, այլ երկարաժամկետ կտրվածքով սառեցնելն է, ընդ որում՝ սառեցումը կատարվում է Ռուսաստանի կողմից, պլանի համաձայն՝ ռուսական խաղաղապահ զորքեր են տեղակայվելու ԼՂ-ում, ԼՂՀ օրինական իշխանություններն այլևս ոչինչ չեն որոշելու, իրավիճակի տերն ու տիրակալը նման տարածքներում հիմնականում ռազմական հրամանատարն է: Դրանով Ղարաբաղը փաստացի կտրում են Հայաստանից և միացնում են Մոսկվային, ինչ-որ տարածքներ տրվում են Ադրբեջանին, և խաղաղությունը մեզ վաճառում է արդեն Ռուսաստանը, ոչ թե Ադրբեջանը, և ռուսաստանը մեզ հասկացնում է, որ այդ խաղաղությունն այնքան կտևի, որքան մենք մեզ հավատարիմ կպահենք, չենք մտածի ոչ ՆԱՏՕ-ի, որ Բրյուսելի հետ հարաբեությունների մասին»:
Փորձագետի կարծիքով՝ այս պլանի էությունը շատ վտանգավոր է. սա ըստ էության, Ղարաբաղը հանձնելու պլան է:
Անդրադառնալով դիտարկմանը, որ իշխանությունները փակ գործընթաց են վարում, և հասարակությունը տեղյակ չէ, թե ինչի շուրջ են բանակցում իշխանությունները, Ս. Սաֆարյանն ընդգծեց. «Մեր քաղաքական ինստիտուտները դադարել են իրենց գործը կատարելը. այսպիսի մտահոգիչ իրավիճակում, երբ այսպիսի հանդիպումից ո՛չ առաջ, ո՛չ դրանից հետո անգամ առկա և չհերքված տեղեկատվության կապակցությամբ հայտարարություններ չեն անում և բացատրություններ չեն պահանջում իշխանություններից, սա վերին աստիճանի մտահոգիչ իրավիճակ է: Այս ամենի դեմ են խոսում փորձագետները, իսկ քաղաքական ուժերը վախվորած են և անհասկանալիորեն լռում են»:
Հարցազրույցն ամբողջությամբ՝ տեսանյութում:
