«Ակնհայտ է, որ շուկայում թանկացումներ կլինեն, քանի որ այն ոլորտներում, որտեղ արդեն թանկացումներ կան, համապատասխան գործողություններ չեն իրականացվել»,- այսօր մամուլի ասուլիսի ժամանակ հայտնեց ՍՊԱԾ նախկին մամուլի քարտուղար, «Իրազեկ և պաշտպանված սպառող» ՀԿ հիմնադիր և նախագահ Բաբկեն Պիպոյանը՝ հավելելով, որ գազի գնի թանկացման թեմայով Հայաստանում տնտեսական վերլուծաբաններ չմնացին, որ չվերլուծեին իրավիճակը, անգամ խնդիրը քննարկվեց քաղաքական շրջանակներում, ինչին հաջորդեց նաև էլեկտրաէներգիայի գնի թանկացումը:
Բանախոսը փաստեց, որ կաթնամթերքի շուկայում նույնպես գնաճ է նկատվել՝ ավելի քան 8-12 տոկոս, ինչի առաջին մեղավորները արտադրողներն են, բայց մեղքի մեծ բաժինը պետական մարմիններինն է, որոնք ոչինչ չեն արել: Առանձին ոլորտներում նկատվում է նաև 15 տոկոս գնած:
«Մենք Սպառողների շահերի պաշտպանության օրենքում չունենք տող, թե պետական որ մարմինը պետք է զբաղվի սպառողների շահերի պաշտպանությամբ»,- ասում է բանախոսը:
Բաբկեն Պիպոյանը նկատեց, որ այս տարվա մայիսի 10-ից գների նվազում չի գրանցվել:
Բանախոսը նշեց նաև, որ չկա տնտեսական վերլուծություն, թե գնաճը պայմանավորված է գազի գնի բարձրացմամբ: Ըստ բանախոսի՝ գազի գնի բարձրացմամբ նման գնաճն արդարացված չէ, քանի որ արտադրությունում գազի գնի բարձրացումը լրացուցիչ էական ծախս չի ենթադրում:
«Միակ եղանակը, որով կխուսափենք գնաճից, արտադրողների շրջանում այն գիտակցումն է, որ գների թանկացումն անմիջապես հայտնվելու է ուշադրության կենտրոնում, և պատասխանատվության են ենթարկվելու»:
«Եթե հանրությունը խոսում է մի արատավոր երևույթի մասին, անպայման ընթացք լինում է: Փորձը ցույց է տալիս, որ հանրային ճնշման դեպքում խնդիրները լուծվում են»,- ասաց Բ. Պիպոյանն ու նկատեց, որ օրինակ՝ կարագ-սփրեյ պատմությունում հանրային ճնշման պարագայում տեղաշարժն ակնհայտ է:
Լուսանկարը՝ PanARMENIAN Photo-ի
