Այս տարի ՀՀ առողջապահության նախարարի ապրիլի 12-ի հրամանով «Տարվա բժիշկ» հանրապետական մրցույթ կանցկացվի հունիսի 21-ին` Բուժաշխատողի օրվա կապակցությամբ: Տասնչորս անվանակարգեր կլինեն, այդ թվում` «Տարվա բժշկական հաստատության ղեկավար», «Տարվա տեղամասային բժիշկ», «Տարվա մանկաբույժ», «Տարվա վիրաբույժ», հատուկ անվանակարգ և այլն
ՀՀ առողջապահության նախարարության աշխատակազմի կառավարման վարչության պետ Սամվել Սողոմոնյանը լրագրողների հետ հանդիպմանը նշեց մրցանակաբաշխության նպատակը, այն է՝ խրախուսել առողջապահության համակարգի արժանի ներկայացուցիչներին, բարձրացնել նրանց վարկը: Նրա խոսքերով` վերջին տարիներին բժշկի վարկն այն չէ, ինչ նախկինում էր և կա դրա բարձրացման անհրաժեշտություն:
Մասնակցելու հայտ ներկայացրել են մի քանի հարյուր թեկնածուներ:
Բանախոսը նշեց նաև, որ ոչ բոլոր բժիշկներն են մասնակցության հայտ ներկայացրել, կան կլինիկաներ, որոնք նպատակահարմար չեն գտել մասնակցել մրցույթին, բայց մյուս տարի մասնակիցիների թիվն ավելի կմեծանա: Սամվել Սողոմոնյանի խոսքերով` պետբյուջեից որևէ գումար չի հատկացվել մրցանակաբաշխության կազմակերպման համար:
Մրցանակաբաշխության գեղարվեստական մասն իրականացրել է Սուրեն Թադևոսյանը, ով ևս մասնակցում էր ասուլիսին։ Նա նշեց, որ սա «ոչ շաբլոն» մրցանակաբաշխություն է, որին իրենք շատ լուրջ են պատրաստվում: «Մենք կփորձենք մի փոքր զարմացնել, ուրախացնել մեր բժիշկներին»,- ասաց նա` հավելելով, որ միջոցառումը հետաքրքիր կլինի՝ հանրապետության լավագույն երգիչների մասնակցությամբ։ Բեմի ձևավորումն, ըստ նրա, նույնպես հետաքրքիր է լինելու:
Հարցին, թե ինչպես է հանձնաժողովը հայտ ներկայացրած բժշիկներից ընտրություն կատարում, Սամվել Սողոմոնյանը պատասխանեց, որ նախ՝ թեկնածուն պետք ունենա առնվազն տասը տարվա աշխատանքային փորձ, չպետք է ունենա վարչական կարգապահական տույժեր, նա պետք է ճանաչում ունենա առողջապահական համակարգում, ազգաբնակչության շրջանում, պետք է իր փորձն ու գիտելիքները փոխանցող լինի, պետք է հստակ բժշկական մասնագիտական ցուցանիշներ ունենա և այլն:
Իսկ այն հարցին, թե ընտրություն կատարելիս հարցում անցկացվե՞լ է ազգաբնակչության շրջանում, նա զարմացավ, թե ինչպես կարելի է հարցումների նկատմամբ վստահություն ունենալ:
Սամվել Սողոմոնյանը նաև հավելեց, որ հետխորհրդային հանրապետություններում բոլորն ունեն համանման մրցանակաբաշխություն, Ռուսաստանը նույնպես ունի։
Նա հավաստիացրեց, որ մրցույթը թափանցիկ է, բաց, և իրոք արժանիներն են հաղթողներ ճանաչվելու, այնպիսի բժիշկներ, որ որևէ մեկի մոտ կասկած չի առաջանա:
Մրցույթը դրամական պարգև չի նախատեսում, կլինի արձանիկ և հավաստագիր:
Մրցույթի վերջնական արդյունքներն ամփոփել է ՀՀ առողջապահության նախարարությունում ստեղծված կենտրոնական հանձնաժողովը, որը փակ գաղտնի քվերակությամբ որոշել է յուրաքանչյուր անվանակարգում մրցույթի հաղթողին:
