Ինչպես հայտնի է՝ ՊԵԿ-ը Սյունիքի մարզում գործող «Դանդի Փրիշս Մեթալս Կապան» ընկերությանը ավելի քան 3.8 մլրդ դրամի կամ մոտ 9.5 միլիոն դոլարի հարկային լրացուցիչ պարտավորություն է առաջադրել, որն աննախադեպ չափի տուգանք է: Այժմ Վարչական դատարան դիմած հանքարդյունաբերող ընկերությունը պահանջում է չեղարկել ֆիննախի տուգանքը, սակայն առայժմ դատական վճիռ չկա:
Թերևս հարկային հետապնդումն ու դատական քաշքշուկն է պատճառը, որ հայ-կանադական ընկերությունը որոշեց 25 միլիոն դոլարով վաճառել «Դանդի Փրիշս Մեթալս Կապան» հանքը ոսկու և արծաթի խոշոր արդյունահանող ռուսական Полиметалл ընկերությանը:
Իսկ այսօր ՀՀ կառավարությունը հայ-կանադական գործարար համաժողովի ընթացքում նոր ներդրողների էր հրավիրում Հայաստանի հանքարդյունաբերության ոլորտ: ՀՀ էներգետիկայի և բնական պաշարների նախարար Լևոն Յոլյանը համաժողովի մասնակիցներին համոզում էր, որ կառավարությունը բարելավում ու կատարելագործում է հարկային դաշտը հանքարդյունաբերության ոլորտում ներդրողների համար:
Մեր հարցին, թե ինչպես են պատրաստվում ներդրողներ ներգրավել, երբ նույն հայ-կանադական «Դանդի Փրիշս Մեթալս» ընկերությունն այսօր բազմամիլիարդանոց դատական վեճի մեջ է հարկային մարմինների հետ, էներգետիկայի և բնական պաշարների փոխնախարար Արեգ Գալստյանը պատասխանեց. «Գիտեք ինչ, բիզնեսում ամեն ինչ էլ կարող է տեղի ունենալ: Ես որևէ խնդիր չեմ տեսնում, այդ ընկերությունը մեր դաշտից դուրս չի գալու: Ինքը հետաքրքրություն ունի և շարունակելու է այստեղ իր գործունեությունը»:
Մեր դիտարկմանը՝ փաստ է, որ ընկերությունն այդ ամենի արդյունքում վաճառեց Կապանի հանքը, փոխնախարարն ասաց. «Ինչ անենք, այդ ընկերությունը վաճառեց, հիմա ուրիշ ընկերություն է աշխատելու: Ինքն էլ շարունակում է ուսումնասիրման առումով այլ հնարավոր աշխատանքները Հայաստանում»:
Մանրամասները դիտեք տեսանյութում:
