ՀՀ նախկին արտգործնախարար Վարդան Օսկանյանը հաստատել է մամուլում տեղ գտած այն տեղեկությունները, որ նա և ԲՀԿ մի քանի այլ պատգամավորներ կստեղծեն նոր կուսակցություն: Մասնավորապես, շրջանառվել են այն պատգամավորների անունները, ովքեր դեմ էին քվեարկել սահմանադրական փոփոխությունների նախագծին: Օսկանյանը, իհարկե, կուսակցության ստեղծման մեջ բացառել է ՀՀ երկրորդ նախագահի մասնակցությունը և անդրադարձել է Մարտի 1-ի իր հայտնի մամուլի ասուլիսին:
«Առաջին լրատվական»-ի խմբագիր Արման Բաբաջանյանը այս առնչությամբ ամենից ուշագրավ է համարում Մարտի 1-ի հանգամանքը. «Այնուամենայնիվ, Օսկանյանի հայտարարությունը՝ մարտի 1-ի պատասխանատուն այդ օրվա իշխանությունն է, որը չպետք է թույլ տար, որ նման բան լիներ, իսկապես անկեղծ ու համարձակ թվացող հայտարարություն է»:
Արման Բաբաջանյանի խոսքով, սակայն, նմանօրինակ հայտարարությունները նպաստում են այն ընդհանրական գործընթացին, որի ամբողջ նպատակը հանրային գիտակցության մեջ Մարտի 1-ի պատասխանատվության լղոզումն է. «Սա դառնում է ներքաղաքական յուրօրինակ կոնսենսուս, որի նպատակն է այն լղոզել, քանի որ ջնջելն, իհարկե, անհնար է»:
Քաղաքագետ Աղասի Ենոքյանի կարծիքով՝ այս կուսակցության ստեղծումը միանշանակ Քոչարյանի համար է, «որովհետև ո՛չ Օսկանյանը, ո՛չ նրա թիմակիցները չունեն որևէ քաղաքական օրակարգ, առանձին խնդիր և ամբիցիաներ, հանուն որոնց նրանք կուսակցություն կստեղծեին»:
Քաղաքագետի խոսքով՝ Քոչարյանը, սակայն, գնալով բաց է թողնում քաղաքականություն մտնելու հնարավորությունները. «Այժմ բոլոր քաղաքական ուժերը նրա վերահսկողությունից դուրս են, և Քոչարյանը ստիպված ստեղծում է այս կուսակցությունը: Սա կլինի մի ուղենիշ, որը կհավաքի Քոչարյանի բոլոր գաղտնի, այսպես ասած, բարեկամներին՝ և՛ իշխանության, և՛ ընդդիմության մեջ, և՛ Հայաստանից դուրս»»:
Ինչպես նկատեց պարոն Ենոքյանը՝ այս ամենի հետևից երևում են Քոչարյանի ականջները, սակայն նա չի հայտնվում, քանի որ ընկալում է, թե ինքն ինչպիսի հանրային վարկանիշ ունի:
Արման Բաբաջանյանի համոզմամբ՝ Երևանի ավագանու ընտրությունները ձախողելուց 3 տարի անց Օսկանյանը չի կարող հաջողել այս քաղաքական պրոյեկտը. «Չի բացառվում, որ սա ոչ այլ ինչ է, քան արտաքին կենտրոններում, նաև Սերժ Սարգսյանի հետ բանակցելու խողովակ՝ լուծելու համար սեփական անվտանգության և ունեցվածքի հարցերը:
Սակայն Սերժ Սարգսյանը պատրաստ է լուրջ դիմակայության: Նա չի հանդուրժելու կիսել Ռոբերտ Քոչարյանի հետ որևէ իշխանություն»:
Ինչ վերաբերում է ընդդիմադիր դաշտին, Արման Բաբաջանյանը կարծում է, որ Օսկանյանի ստեղծելիք կուսակցությունն ու ՀԱԿ-ը չպիտի դժվարություն ունենան համագործակցելու, որովհետև «նրանք հաղթահարել են Մարտի 1-ի արյունը»:
