Վերջին շրջանում շատ էին խոսակցություններն այն մասին, թե ի վերջո՝ Վարդան Օսկանյանը կստեղծի՞ կուսակցություն, թե՞ ոչ: Կամ որ ավելի ճիշտ կլինի ձևակերպել՝ ի՞նչ տեսքով առաջիկա խորհրդարանական ընտրություններին կներկայանա Ռոբերտ Քոչարյանի քաղաքական թիմը: Այն նույն թիմը, որը 2015թ. փետրվարի 12-ին Սերժ Սարգսյանի ՀՀԿ քաղխորհրդի առջև ունեցած ելույթից ու Ծառուկյանի ԲՀԿ-ն լքելուց հետո իրեն դուրս էր դրել ԲՀԿ-ից, բայց ոչ քաղաքականությունից:
Օսկանյանը իր կողմից կուսակցություն ստեղծելու հարցի վերաբերյալ մինչև վերջերս որևէ հստակ և հրապարակային պարզաբանում չէր տալիս, եթե հաշվի չառնենք այն, որ առանձին լրագրողների հետ զրույցներում հաստատում էր կուսակցություն ստեղծելու իր մտադրությունը՝ ավելացնելով, որ դա ասում է ոչ հրապարակման համար: Իսկ քոչարյանական թիմի ներկայացուցիչները հրապարակավ ողջունում էին Օսկանյանի կողմից կուսակցություն ստեղծելու գաղափարը՝ դրանով ընդամենը մատնելով, որ Օսկանյանը առաջիկայում կհայտարարի կուսակցություն ստեղծելու մասին, և իրենք էլ կլինեն այդ կուսակցության մեջ:
Օսկանյանը երկար ձգելուց հետո, նախորդ օրը այնուամենայնիվ հայտարարեց որ պատրաստվում է կուսակցություն ստեղծել և ակտիվորեն ներգրավվել ընտրական գործընթացներում: Նախկին արտգործնախարարը դա արեց իր Facebook-յան էջում գրառում կատարելու միջոցով: Ֆորմալ առումով այդ գրառումը վերաբերում էր նոր Ընտրական օրենսգրքի նախագծին: Օսկանյանը ներկայացրել էր 6 կետից կազմված առաջարկություններ, այլ հասարակական, քաղաքական ուժերի ևս առաջարկելով համախմբվել այդ առաջարկությունները կյանքի կոչելու համար: Բայց Facebook-յան իր գրառման վերջաբանում Օսկանյանը, ըստ էության, հայտարարել էր կուսակցություն ստեղծելու իր մտադրության մասին:
«Ինչ վերաբերում է իմ և իմ համախոհների քաղաքական վարքագծին, ապա մենք ակտիվորեն ներգրավվելու ենք ինչպես օրենսդրական քննարկումներում, այնպես էլ բուն ընտրական գործընթացներում` որպես հիմք ընդունելով հասարակական-քաղաքական լայն համախմբման միջոցով երկրում դրական փոփոխությունների հասնելու սկզբունքը»,- գրել էր Վարդան Օսկանյանը:
Ուշադրություն դարձրեք ընտրական գործընթացներում ներգրավված լինելու Օսկանյանի հայտարարությանը: Օսկանյանը շատ լավ ծանոթ է նոր Ընտրական օրենսգրքին և գիտի, որ ընտրական գործընթացներին հնարավոր է մասնակցել բացառապես կուսակցության միջոցով: Նշանակում է, որ իր համախոհների հետ ընտրական գործընթացներին մասնակցելու խոստումը, բառացիորեն պետք է հասկանալ որպես համախոհների հետ կուսակցություն ստեղծելու մասին հայտարարություն: Իսկ այն խոստումը, որ Օսկանյանը և իր համախոհները ակտիվ մասնակցություն են ունենալու նաև օրենսդրական քննարկումների ժամանակ, նշանակում է, որ կուսակցության ստեղծման մասին հայտարարությանը չպետք է երկար սպասել: Խորհրդարանում նոր Ընտրական օրենսգրքի քննարկումները նախատեսվում է սկսել ապրիլի 4-ին մեկնարկող հերթական նստաշրջանի ժամանակ: Սա նշանակում է, որ արդեն ապրիլի 4-ին Օսկանյանը պետք է հայտարարած լինի այդ կուսակցության ստեղծման մասին, և այդ ժամանակ մենք կիմանանք, թե ովքեր են նրա համախոհները ոչ միայն խորհրդարանում, այլ նաև խորհրդարանից դուրս:
Ինչպես առիթ ունեցել ենք ասելու, Օսկանյանը Քոչարյանի քաղաքական թիմի համար քաղաքական գործընթացներին մասնակցելու պահեստային տարբերակ էր: Քոչարյանական թիմը շատ կուզեր հերթական անգամ խաղարկել՝ հզոր, հարուստ և երկրի մասին մտահոգ օլիգարխը ուզում է փրկել հայրենիքը չար նախագահից սցենարը, միայն մի տարբերությամբ, որ փրկչի դերում այս անգամ Ծառուկյանի փոխարեն պետք է հանդես գար Արա Աբրահամյանը:
Դեռևս նախորդ տարվա աշնանը Աբրահամյանը խոստացել էր, որ մարտին Հայաստանում կուսակցություն կստեղծի, ինչից հետո քոչարյանական թիմը լծվել էր Արա Աբրահամյան փրկչի կերպարի կերտմանը և առաջմղմանը: Բայց փետրվարին Աբրահամյանը հետքայլ կատարեց իր նախորդ խոստումից՝ հայտարարելով, որ դեռ մտածում է, թե ինչպես մասնակցի Հայաստանի հասարակական-քաղաքական գործընթացներին՝ չբացառելով, որ դա կարող է լինել արդեն գործող կուսակցություններից մեկին աջակցելու միջոցով, երևի նկատի ունենալով «Հայկական վերածնունդը»: Իսկ հիմա արդեն ավելի քան պարզ է, որ նա չի գնա կուսակցություն ստեղծելու և իշխանությանը հակադրվելու ճանապարհով:
Քոչարյանական թիմը չէր կարող կոնսոլիդացիայի ենթարկվել «Հայկական վերածնունդի» շրջանակներում, դրա համար նրանք որոշեցին գործի դնել պահեստային տարբերակը՝ Օսկանյանին: Իհարկե, Օսկանյանին դժվար է ներկայացնել որպես փրկիչ, քանի որ Օսկանյանը չունի փրկչին վերագրվող ոչ մի ատրիբուտ՝ փող և հարստություն: Բայց սեփական կուսակցություն ունենալը լեգիտիմ հնարավորություն է մասնակցելու քաղաքական գործընթացներին, մանավանդ որ՝ Օսկանյանը արդեն հիմա հանդես է գալիս հասարակական-քաղաքական դաշտը համախմբելու կարգախոսներով և ամբիցիաներով:
