Սիրիայի նախագահ Բաշար Ասադը պետք է ուժով տապալվի` Սիրիայի ճգնաժամի քաղաքական ճանապարհով կարգավորման ձախողման դեպքում: Նման հայտարարություն արել է Սաուդյան Արաբիայի ԱԳՆ ղեկավար Ադել էլ-Ջուբեյրը` CNN-ի հետ հարցազրույցում:
«Ես ոչ մի կասկած չունեմ, որ Ասադը կհեռանա: Դա կամ տեղի կունենա իշխանության քաղաքական անցման շրջանակներում, կամ նա կտապալվի ուժային ուղով»,-հայտարարել է նախարարը: Նրա խոսքերով` Էր-Ռիադը մտադիր է աշխատել Սիրիայի ճգնաժամի խաղաղ կարգավորման շուրջ: «Ձախողման դեպքում, մեղքը Սիրիայի իշխանություններին ու նրա դաշնակիցներինն է»,- հավելել է նա:
Նա հստակեցրել է, որ Սաուդյան Արաբիան պատրաստ է Սիրիա ցամաքային զորքեր ուղարկել ԴԱԻՇ միջազգային ահաբեկչական խմբավորման դեմ պայքարի համար: Սակայն նրանք միայն կգործեն ԱՄՆ-ի գլխավորած միջազգային կոալիցիայի կազմում:
