Իրաքի քաղաքական շրջանակներից տեղյակ աղբյուրները հայտնել են, որ Իրաքի կառավարությունը զբաղված է Իրաքի տարածք իրանական զորք մտցնելու վերաբերյալ Իրանին ուղղված հայտի քննարկմամբ՝ Ռամադի քաղաքը ԴԱԻՇ-ի ջոկատներից ազատելու նպատակով: Այս մասին հայտնում է իրաքյան Sky Press տեղեկատվական գործակալությունը:
Հաղորդվում է, որ ազգային կառավարությունն այդ թեման սկսել է քննարկել թուրքական զորքերն Իրաքի հյուսիսային մաս մտցնելուց և դրանք Մոսուլ քաղաքի արվարձաններում տեղակայելուց հետո:
Անանուն աղբյուրի խոսքով՝ «դեկտեմբերի 8-ին Իրաքի ազդեցիկ քաղաքական խմբակցություններից մեկը կդիմի երկրի նախարարների խորհրդին, որպեսզի այն պաշտոնապես դիմի Իրանի կառավարությանը զորք մտցնելու խնդրանքով՝ ԴԱԻՇ-ի զորքերից Ռամադի քաղաքի ազատման գործում Բաղդադի ղեկավարությանն օգնելու և բանակի ու Իրաքի ժողովրդի կամավորական ստորաբաժանումների հետ ջանքերի միավորման համար»:
Նույն աղբյուրը հայտնել է. «Ազգային կառավարությանը և բանակին օգնություն ցուցաբերելու համար Իրաքի տարածք զորքեր մտցնելու վերաբերյալ Իրանին պաշտոնական դիմումի մասին առաջարկը ստացվել է այն բանից հետո, երբ Թուրքիան իր զինված ուժերն է ուղարկել Իրաքի հյուսիս»:
Հաղորդվում է, որ Իրաքի պաշտոնական ներկայացուցիչները համոզված են, որ իրանական զորքերն Իրաք մտցնելով հնարավորություն կստեղծվի որոշ չափով խոչընդոտել հարևան պետության ներքին գործերին Թուրքիայի չափազանց միջամտությունը և յուրատեսակ պատնեշ ստեղծել նրա մշտապես աճող ախորժակի համար:
Դեկտեմբերի 6-ին թուրքական Hurriyet թերթը հայտնել էր, որ Թուրքիան բազա է ստեղծել Բաշիգա ռազմական կենտրոնում, որը Մոսուլից 30 կմ է հեռու, և այնտեղ իր 600 զինծառայող է տեղակայել: Թուրքիայի իշխանություններն այդ քայլին գնացել են Իրաքի Քրդական ինքնավարության ղեկավար Մասուդ Բարզանիի համաձայնությամբ:
Դրա հետ մեկտեղ Թուրքիայի կառավարությունը պաշտոնական Բաղդադին չի տեղեկացրել Իրաքի տարածք իր զորքերը մտցնելու մասին: Անկարան հայտարարել է, որ ԴԱԻՇ-ի դեմ միջազգային կոալիցիան՝ ԱՄՆ-ի գլխավորությամբ իմացել է զորքերի այդ տեղակայման մասին, ուստի Թուրքիայի ղեկավարությունն անհրաժեշտ չի համարել այդ մասին հայտնել Իրաքի կառավարությանը: ԱՄՆ-ը, իր հերթին, հայտնեց, որ իրենց հայտնի է եղել թուրքական զորքերի ներկայության մասին, սակայն նրանք Իրաքի տարածք են մտել ոչ որպես ԴԱԻՇ-ի դեմ կոալիցիա:
Իրաքի խորհրդարանի պատգամավոր Ալիա Նասիֆը՝ Իրաքի նախկին վարչապետ Նուրի Մալիքիի գլխավորությամբ Օրինական կառավարության կոալիցիայից Քրդական ինքնավարության ղեկավարին և Սաուդյան Արաբիայի իշխանություններին մեղադրել է իր երկրի դեմ դավադրոթյան մեջ և հայտարարել է, որ հենց նրանք են կանաչ լույս տվել Թուրքիային, որ նա օկուպացնի Իրաքի տարածքը:
Դրա հետ կապված՝ Իրաքի պաշտպանության նախարարությունը հայտարարել է, որ իրենց տվյալներով՝ Իրաքի սահմանի մոտ տեղակայված է 1200 թուրք զինվոր, որոնք պատրաստ են հատել Իրաքի սահմանը:
Միաժամանակ, Թուրքիան պնդում է, որ այդ ուժերը տեղակայվել են Բաշիգա բազայում քրդական փեշմերգ ուժերի ուսուցման համար: Դրանից բացի՝ տեղեկատվական գործակալությունները տեղեկություն են տարածում, որ այդ ուժերի հետ Իրաքի տարածքում է հայտնվել առնվազն 20 տանկ և որոշակի քանակի ծանր զենք՝ ներառյալ հրետանի:
Իրաքի վարչապետ Հայդեր ալ-Աբադին Թուրքիայից պահանջել է ամենակարճ ժամկետում զորքերը դուրս բերել իր երկրի տարածքից՝ այդ ներխուժումն անվանելով բարիդրացիական հարաբերությունների, Իրաքի տարածքային ամբողջականության և ինքնիշխանության սկզբունքների խախտում:
Պետք է նշել, որ անցած շաբաթվա վերջին Մասուդ Բարզանին այցելել է Սաուդյան Արաբիա, որտեղ հանդիպել է թագավորության որոշ պաշտոնական ներկայացուցիչների հետ: Շատ վերլուծաբաններ Իրաքի տարածք թուրքական զորքերի ներխուժումը կապում են այդ այցի հետ:
