Իրանը հավանություն է տվել համատեղ ռուս-իրանական բանկի ստեղծման Ռուսաստանի առաջարկին։ Այս մասին փոխանցում է RIA Novosti-ն՝ հղում անելով ռուս-իրանական միջկառավարական հանձնաժողովի փոխնախագահ Մեհդի Մոհտաշամիին։
«Համատեղ բանկի հիմնումը միջկառավարական հանձնաժողովի նպատակներից մեկն է։ Մենք այդ առաջարկը ստացել ենք ռուսական կողմից, և այն ուսումնասիրվել է Իրանի ԿԲ-ի կողմից, իրանական կողմից կա կոնսենսուս և հավանություն նման համատեղ բանկի ստեղծման շուրջ»,- ասել է նա։
Մոհտաշամին նշել է, որ դա անհավանական կարևոր է Իրանի համար, քանի որ այժմ իրանական բանկերը գտնվում են պատժամիջոցների տակ։
«Մեխանիզմներից մեկը, որը կարող է ապահովել և արագացնել առևտրային համագործակցությունը երկու երկրների միջև, նման համատեղ բանկի ստեղծումն է։ Չկա որևէ առարկություն բանկի ստեղծման հարցում, սակայն անհրաժեշտ է ուսումնասիրել մանրուքները»,- ասել է նա։
Գործակալության աղբյուրի փոխանցմամբ, որը մասնակցել է ռուս-իրանական միջկառավարական հանձնաժողովի բանակցություններին, բանկի ստեղծման գործնական աշխատանքի համար խոչընդոտ է հանդիսանում Իրանի դեմ պատժամիջոցների գործողությունը։ Զրուցակիցը նշել է, որ հենց պատժամիջոցները հանվեն, կսկսվի դրա ստեղծման գործնական աշխատանքը՝ հավանաբար երկու ամսից։
