Սեղմված գազի ակցիզային հարկը հունվարի 1-ից կբարձրանա: Պատճառը հարկային դրույքաչափերը ԵՏՄ անդամ երկրների դրույքաչափերի հետ ներդաշնակեցնելն է:
Հոկտեմբերի 29-ին խորհրդարանում երկրորդ ընթերցմամբ ու առանց որևէ խոչընդոտի ընդունված «Ակցիզային հարկի մասին» օրենքում փոփոխություններ կատարելու մասին օրենքի նախագիծը, կարող է նոր ֆինանսական բեռ դառնալ թե՛ տնտեսվարողների, թե՛ սպառողների համար: Փոփոխությունները ենթադրում են նաև լիտրը 6-8 դրամով բենզինի և 10 %-ով ծխախոտի ու խմիչքի ակցիզային հարկի ավելացում: Եթե վերջինները առաջին անհրաժեշտության սպառման ապրանքներ չեն համարվում, ապա բենզինի ու գազի գների բարձրացումը անհետևանք չի մնա:
«Իրազեկ և պաշտպանված սպառող» ՀԿ նախագահ Բաբկեն Պիպոյանի դիտարկմամբ՝ օրենքի նման փոփոխությունների հետևանքների մասին դեռևս դժվար է խոսել, սակայն վստահ է՝ սա բերելու է բնական գնաճի:
Իշխանության ներկայացուցիչները պնդում են, որ գնաճ չի լինելու, և տնտեսվարողները հարկային ավելացումները վճարելու են ոչ թե սպառողների, այլ իրենց հաշվին:
Պիպոյանը վստահ է՝ եթե անգամ գազի կամ բենզինի գինը փոփոխության չենթարկվի, միևնույն է՝ խնդիրը ոչ միայն չի վերանում, այլև ավելի խորքային է դառնում:
Գազի գնից ու գազալցակայանների լիցքավորումից վարորդներն այսօր էլ են դժգոհում: Նրանք վստահ են՝ ակցիզային հարկի ավելացումից հետո, եթե անգամ գազի կամ բենզինի գինը նույնը մնա, ապա այդ ամենը կանդրադառնա սպասարկման, ասել է թե՝ լիցքավորման չափի վրա: Արդյունքում փոփոխությունը ուղղակի կամ անուղղակի կերպով կանդրադառնա սպառողների վրա:
