Աֆղանստանի վարչապետ Աբդուլլա Աբդուլլան բոլոր բնակիչներին լրացուցիչ նախազգուշական միջոցների կոչ է արել հնարավոր հետցնցումների հետ կապված: Այս մասին հայտնում է Tolo News գործակալությունը:
Սա Քաբուլի ներկայացուցիչների առաջին ուղերձն է ժողովրդին 7,7 մագնիտուդով երկրաշարժից հետո, որի ցնցումները զգացվել են հարևան Պակիստանում, Հնդկաստանում, Ղրզըզստանում, Ադրբեջանում և Ղազախստանում:
Բնական աղետին զոհ է դարձել ընդհանուր մոտ 105 մարդ, տուժածների մասին տվյալները տարբեր աղբյուրներում տարբեր են՝ 200-ից մինչև մի քանի հարյուր մարդ:
«Սա վերջին տարիների ամենահզոր երկրաշարժն է,- ասել է Աբդուլլան:- Մենք հնարավոր ամեն ինչ անում ենք տուժածների համար առավելագույն հարմարավետություն ապահովելու համար: Կառավարությունը քննարկում է վնասը չափելու և տուժածների պահանջմունքները գնահատելու միջոցները»: Վարչապետը հաստատել է, որ եկրի որոշ շրջաններում «խափանված է բջջային կապը»:
«Մենք դիմել ենք հումանիտար կազմակերպություններին՝ տուժածներին օգնություն ցուցաբերելու համար,- նշել է նա:- Ներկայումս շարունակվում է արտահերթ նիստը, որում քննարկվում է օգնության փաթեթը»:
Երկրաշարժը տեղի է ունեցել տեղի ժամանակով 14:09-ին: Ստորգետնյա ցնցման օջախը գտնվել է 212.5 կմ խորության վրա՝ Ժարմ քաղաքից 45 կմ հարավ-արևմուտք։
https://youtu.be/_wRnPTEu6j4
https://youtu.be/vM6QHIHWK78
