«Գլաձոր» համալսարանի իրավաբանական ֆակուլտետի ուսանող Սերգեյ Գրիգորյանը երկուշաբթի օրը ՀՀ վերաքննիչ վարչական դատարան հայց կներկայացնի՝ ընդդեմ ՀՀ վարչական դատարանի վճռի, որով մերժվել է Պետական եկամուտների կոմիտեի և ֆինանսների նախարարության դեմ իր ներկայացրած բողոքը: Դրանով հայցվորը պահանջում էր անվավեր ճանաչել ՊԵԿ-ի 2012 թ. հուլիսի 25-ի որոշումը: Այդ որոշմամբ ՊԵԿ-ը Սերգեյին մերժել էր «գործարքի գնի» մեթոդով մաքսազերծել ավտոմեքենան: Հայցվորը պահանջում էր նաև ֆինանսների նախարարությունից հօգուտ իրեն բռնագանձել պետական տուրքի գումարը, ինչպես նաև այս ժամանակաընթացքում մաքսային պահեստում տարածք զբաղեցնելու համար պահանջվող օրական 1300 դրամ գումարը:
Ինչպես «Առաջին լրատվական»-ին հայտնեց Սերգեյ Գրիգորյանը, վերջերս գործը քննվել է ՊԵԿ-ի հետաքննության վարչությունում, որի որոշումը նույնպես սպասվում է հաջորդ շաբաթ:
Հիշեցնենք, որ 2012 թ. հուլիսին Սերգեյն անձնական օգտագործման համար Ճապոնիայից Հայաստան է ներկրել 10 հազ. ԱՄՆ դոլար արժողությամբ 2004 թ. արտադրության «Mercedes-Benz CLK 320» մակնիշի ավտոմեքենա: Մինչ ՀՀ հասնելը մեքենայի տեղափոխման համար կատարված վճարումների բոլոր փաստաթղթերը նա ներկայացրել է մաքսատուն, սակայն մաքսավորները դրանք թերի են համարել ու կիրառել են «հսկիչ գին»: Ընդ որում՝ ոչ թե գործարանային գինն է ընդունվել որպես հիմք, այլ այն, ինչ գնով այդ ավտոմեքենան վաճառվում է Հայաստանում (17.5 հազ. ԱՄՆ դոլար): Ստացվել է, որ Սերգեյ Գրիգորյանը պետք է վճարի 6000 դոլար այն դեպքում, երբ «գործարքի գնի» մեթոդի կիրառման դեպքում մաքսազերծումը կարժենար ընդամենը 4000 դոլար:
