ՌԴ-ն ցույց չի տվել, թե Մաքսային միությունում չի սպասում Հայաստանին, պարզապես Սարգսյանին ավելի հեշտ է այդպես ասել: Այս մասին «Առաջին լրատվական»-ի հետ զրույցում ասաց ռուսաստանցի քաղաքագետ Սերգեյ Միխեևն՝ անդրադառնալով ՀՀ նախագահ Սերժ Սարգսյանի այն դիտարկմանը, թե Մաքսային միությունում Հայաստանին չեն սպասում: Ռուսաստանցի քաղաքագետի համար անհասկանալի է, թե ինչի հիման վրա է Սերժ Սարգսյանը նման հայտարարություն արել:
Միխեևը նշեց, որ Մաքսային միության հարցն այսօր չափազանց ակտուալ է ինչպես ՌԴ-ի, այնպես էլ Հայաստանի համար: Բայց, ըստ նրա, Հայաստանի կարգավիճակն այնքան յուրահատուկ է ու դժվար, որ շատ հարցեր դեռևս քննարկման, մշակման և համաձայնության կարիք ունեն:
«Ես չեմ կարծում, թե ՌԴ-ն հստակ ցույց է տվել, որ Հայաստանին Մաքսային միությունում չի սպասում: Ինքը՝ Հայաստանը, պատրաստ չէ Մաքսային միությանն անդամակցելու, այդ պատճառով Սերժ Սարգսյանին ավելի հեշտ է ասել, որ ՀՀ-ին Մաքսային միությունում չեն սպասում, քան Մաքսային միության անդամակցության համար անհրաժեշտ բարեփոխումներ անել: Բացի այդ, այս հայտարարությունը, թե Մաքսային միությունում Հայաստանին չեն սպասում, իրավիճակի գերագնահատում է: Մաքսային միությանն անդամակցելը չի կարող կարճաժամկետ գործընթաց լինել, մանավանդ՝ Հայաստանի դեպքում, որը Մաքսային միության հետ մեկ ընդհանուր սահման չունի: Սա բավական բարդ հարց է»,- մեկնաբանեց քաղաքագետը՝ հավելելով, որ տեսականորեն Հայաստանը կարող է անդամակցել Մաքսային միությանն, իսկ գործնականորեն այդ հարցը կարճ ժամանակահատվածում չի կարող լուծվել, որովհետև ընդհանուր սահման չկա:
Սերգեյ Միխեևի կարծիքով՝ ՌԴ-ի համար խնդիր չէ, որ Հայաստանը տնտեսական համագործակցության մեջ մտնի տարբեր երկրների՝ ԱՄՆ-ի, Չինաստանի, Թուրքիայի, ինչպես նաև՝ ԵՄ-ի հետ: Նրա խոսքերով՝ այս հարցի վերաբերյալ որևէ երկիր, այդ թվում ՌԴ-ն չի կարող առարկություն ունենալ:
«ՌԴ-ի կողմից դժգոհություն կարող է լինել, երբ խոսք լինի Հայաստան-ԵՄ ռազմաքաղաքական համագործակցության մասին, օրինակ՝ ՆԱՏՕ-ին անդամակցելու հեռանկարներ։ Իսկ ԵՄ-ին անդամակցելու հեռանկարներ, կարծում եմ, Հայաստանը չունի: Ինչպես երևում է վերջին տարիներին, Արևմուտքը ոչ ԵՄ կազմում գտնվող երկրների հետ մի սցենար է օգտագործում՝ սկսվում են խոսակցություններ ՆԱՏՕ-ին անդամակցելու վերաբերյալ, ասես խայծ են գցում: Իրականում այստեղ մեկ այլ բան է թաքնված՝ մինչ ԵՄ-ին անդամակցելը ԵՄ-ն այդ երկրների առջև դնում է ՆԱՏՕ-ին անդամակցության հարցը: Ասում են՝ եկեք, դարձեք մեր ռազմաքաղաքական գործընկերը, այնուհետև ԵՄ-ին կանդամակցեք: Ի դեպ, եթե ուշադիր լինեք, Արևմուտքն այս մոդելը շատ երկրների դեպքում է օգտագործում: Իմ համոզմամբ՝ սա Արևմուտքը նաև Հայաստանի դեպքում է փորձելու օգտագործել: Հայաստան-Արևմուտք ռազմաքաղաքական համագործակցությունը ՌԴ-ին կզգաստացնի, կանհանգստացնի:
Ինչ վերաբերում է տնտեսական կապերին, շահերին, ապրանքաշրջանառությանը, որևէ կողմի մոտ հարցեր չկան: Ի վերջո, ՌԴ-ն ևս զարգացած հարաբերություններ ունի ԵՄ-ի հետ: ՌԴ-ն կարող է ըմբոստանալ, եթե տնտեսական հարաբերությունների քողի տակ լինի ռազմաքաղաքական համագործակցության ծրագիր»,- մեկնաբանեց Սերգեյ Միխեևը:
