Երեկ լրագրողների հետ հանդիպման ժամանակ ՀՀ նախագահ Սերժ Սարգսյանն ասել էր, որ ինքը Րաֆֆի Հովհաննիսյանին երեք ճանապարհ էր առաջարկել: Առաջինը՝ Րաֆֆի Հովհաննիսյանը գնում է Ազատության հրապարակ, շարունակում է պնդել, որ ստացել է քվեների 80 տոկոսը, իրեն հռչակում է նախագահ և փորձում է ստեղծել իշխանության այլընտրանքային կառույցներ, երկրորդ՝ Րաֆֆի Հովհաննիսյանը, շարունակելով պնդել, որ ընտրություններն արդար չեն անցել, որ ինքն իրականում հավաքել է պաշտոնականից ավելի բարձր տոկոսներ, ուժեղացնում է իր կառույցները, մասնակցում է Երևանի ավագանու ընտրություններին, ստանում է մեծամասնություն, դառնում է Երևանի քաղաքապետ և ղեկավարում է հանրապետության մեկ երրորդը, երրորդ՝ դադարում է ընդդիմություն լինելուց՝ ներգրավվելով իշխանական կառույցների մեջ, և պայքարում է կոռուպցիայի ու արտագաղթի դեմ:
«Առաջին լրատվական»-ի հետ զրույցում «Վերելք» քաղաքական վերլուծությունների հիմնադրամի նախագահ Արծրուն Պեպանյանը նշեց, որ եթե Րաֆֆի Հովհաննիսյանը կարողանա ստեղծել իշխանության այլընտրանքային կառույցներ, հրաշալի կլինի: Բայց, Պեպանյանի համոզմամբ, մեր քաղաքական միտքը պատրաստ չէ դրան, չունի լուծումներ, իսկ եթե Րաֆֆի Հովհաննիսյանը չհաջողի, դա լինելու է բոլորիս անհաջողությունը:
«Լավ իմանալով, որ ընտրություններով հնարավոր չէ մեզանում իշխանություն փոխել՝ մենք այդպես էլ չխորհեցինք այլընտրանքային ուղու մասին: Այնպես որ, բոլոր նրանք, ովքեր այսօր ուրախանում են Րաֆֆի Հովհաննիսյանի գլխավորած շարժման դժվարություններով, պարտավոր են ընդունել իրենց անզորությունը ևս: Ամեն շարժման պարտություն բոլորիս պարտությունն է»,- տեսակետ հայտնեց մեր զրուցակիցը:
Խոսելով Երևանի ավագանու ընտրությունների մասին՝ Արծրուն Պեպանյանը նշեց, որ, ամենայն հավանականությամբ, իշխանությունները կջանան ուղղել նախագահական ընտրություններում իրենց գործած սխալը և կապահովեն պահանջվող տոկոսները. մայրաքաղաքը ոչ մի իշխանություն չի զիջի ընդդիմությանը: Շահեկանն, ըստ վերլուծաբանի, իհարկե, երրորդ տարբերակն էր, և տխուր կլինի, եթե այն կյանքի չկոչվի. «Ժողովուրդը մեղք է, հայրենիքը մեղք է»:
«Այնուամենայնիվ, եթե Րաֆֆի Հովհաննիսյանը նախընտրի առաջին տարբերակը, ապա մեր քաղաքական միտքը պիտի իր պարտքը համարի խորհել այլընտրանքային տարբերակի ստեղծման շուրջ։ Սա Րաֆֆի Հովհաննիսյանի հարցը չէ, սա երկրի հարցն է»,- ասաց Արծրուն Պեպանյանը:
