190 կգ քաշով կինն ասում է, որ գիրությունը խանգարում է իրեն աշխատանքի տեղավորվել, այդ պատճառով էլ ինքը վիրահատության միջոցներ չունի: Սակայն գեր կինը չի հուսահատվում, քանի որ հույսը դրել է հարկատուների օգնության վրա:
Վենդի Ֆիլիփսի խոսքերով՝ ինքը սկսել է քաշ հավաքել առաջին հղիության ընթացքում. նա գիրացել է 38 կգ-ով:
Առաջնեկի ծնվելուց հետո Վենդին բաժանվել է երեխայի հորից և սկսել է ուտելով «լցնել» իր միայնությունը: Որոշ ժամանակ անց կինը ծանոթացել է Շոն անունով ֆիթնես-խորհրդատուի հետ, ով փորձել է իր ընկերուհուն ճիշտ ուղու վրա դնել: Սակայն Վենդիի երկու երեխաների ծնունդը կնոջը ոչ միայն ուրախալի հոգսեր, այլև քաշի հավելում է բերել:
2009 թ. երեք երեխաների մայրը դիմել է բժիշկներին՝ ստամոքսի փոքրացման համար, սակայն իմանալով, որ մինչ վիրահատությունը ստիպված է 12 շաբաթ հատուկ սնունդով սնվել՝ շտապել է հեռանալ հիվանդանոցից։
Անցել է 4 տարի, և վիրահատության համար կուտակված միջոցները ծախսվել են, սակայն անգլուհին հույսը չի կորցնում՝ հավատալով, որ հարկատուները կվճարեն իր 22.000 դոլար արժողությամբ վիրահատության համար։
