Թուրքական Cumhuriyet թերթի փոխանցմամբ՝ Թուրքիայի նախագահ Ռեջեփ Էրդողանը հանդիպել է Ստամբուլում երրորդ օդանավակայանը կառուցող աշխատակիցների թիմի հետ։ Էրդողանը նրանց հայտնել է, որ Ստամբուլում կառուցվում է Թուրքիայի և աշխարհի խոշորագույն օդանավակայանը։
Էրդողանը հայտարարել է, որ եթե ամեն ինչ իր հունով ընթանա, ապա Ստամբուլի երրորդ օդանավակայանը կբացվի 2018 թվականի առաջին քառորդում. «Ներկա դրությամբ (Ստամբուլի) Սաբիհա Գյոչքենի անվան օդանավակայանից օրական թռչում ու վայրէջք է կատարում 628 ինքնաթիռ։ Սակայն դա բավական չէ։ Աթաթուրքի անվան օդանավակայանի աշխատանքի հետ կապված նույնպես կան մտահոգություններ»։
Էրդողանը կարևորել է նաև Սև և Մարմարա ծովերը միմյանց կապող Ստամբուլի ջրանցքի և Ստամբուլում Բոսֆորի նեղուցի վրա երրորդ կամրջի կառուցումը, որը ստացել է օսմանյան սուլթան Սելիմ Ահեղի անունը։ Էրդողանի խոսքով՝ 2017 թվականին կբացվի Եվրասիա երկհարկանի թունելը, որն անցնելու է Բոսֆորի նեղուցի հատակով։
Էրդողանը խոսել է նաև ազգի միասնության կարևորության մասին․ «Պետության մեջ պետություն ճանաչելն անընդունելի է մեզ համար։ Մենք միասնության ու համերաշխության կարիք ունենք, մենք մեզ մասնատել ցանկացողների դեմ համատեղ պայքարելու կարիք ունենք։ Մենք՝ քրդով, թուրքով, չերքեզով ու արաբով, մեկ ենք, եղբայր ենք, բոլորս միասին Թուրքիա ենք։ Մենք լինելու ենք մեկ ազգ, մեկ դրոշ, մեկ հայրենիք, մեկ պետություն։ Մենք չենք կարող ունենալ երկրորդ դրոշ։ Պետության մեջ պետություն ունենալը անընդունելի է»։
